Aqtóbede kýrsant ólimine qatysty tergeý aıaqtaldy
AQTÓBE. KAZINFORM — Qazir Qylmystyq kodekstiń 453-baby 2-bóligimen sotqa deıingi tergep-tekserý júrip jatyr. Búgin beıbit jınalys ótti. Al qylmystyq is boıynsha tergeý aıaqtalyp, taraptar is materıalymen tanysyp jatyr.
Kýrsant óliminen soń Qylmystyq kodekstiń 453-baby 2-bóligimen is qozǵalyp, eki kúdikti qamaýǵa alyndy. Onyń biri ofıtser, ekinshisi serjant. Búgin ofıtser Z.Tólegennniń áıeli Altynaı Tólegenova pıket túrindegi beıbit jınalys ótkizdi.
— Men áskerı qyzmetker Zamanbek Tólegenniń áıelimin. Ol 31 shildeden beri qamaýda jatyr. Al oqıǵa 15 shildede boldy. Joldasym negizi orta býyn avıatsııa mamandaryn daıyndaıtyn oqý ornynda jumys isteıdi. Sol kezde issaparmen keldi, nusqaýshy retinde qatysty. Biraq ol kelgenge deıin de parashıýt durys bolmaǵan, — dedi Altynaı Tólegenova.
Ol búgin áskerı prokýratýra aldynda jalǵyz ózi pıket ótkizdi. Ákimdikten aldyn-ala ruqsat aldy. Sonymen birge prokýratýra aldyna Nurjan Aıdenovtyń áıeli de keldi.
— Men ofıtser Nurjan Aıdenovtyń joldasymyn. Ol qazir kýrsant ólimine qatysty qylmystyq is boıynsha kúdikti retinde tanylyp otyr. Tergeýdiń ádil ótkenin qalaımyz. Sebebi biz bul oqıǵaǵa basqa da adamdar kináli dep oılaımyz. Joldasym dál osy ınstıtýttyń qyzmetkeri emes, — deli Nargız Aıdenova.
Aqtóbe garnızonynyń áskerı prokýrory Rolan Jeńisbaev qazirgi kezde tergeý aıaqtalǵanyn habarlady.
— Ásker tergeý basqarmasy Qylmystyq kodekstiń 453-baby 2-bóligimen sotqa deıingi tergep-tekserý júrgizdi. Kúdikti retinde oqý-jattyǵý jetekshisi jáne sekirý aldyndaǵy tekserýshi tanyldy. Tergeý sotynyń sanktsııasymen kúdiktilerge qatysty 2 aı merzimge qamaýǵa alý bultartpaý sharasy qoldanyldy. Qazir tergeý áreketteri aıaqtalyp, qylmystyq is materıaldarymen tanysý júrgizilip jatyr. Basqa da laýazymdy tulǵalardyń qylmystyq jaýapqa tartylmaýy týraly ýáj boıynsha aıtar bolsam, sotqa deıingi tergep-tekserý barysynda istiń barlyq mán-jaıy jan-jaqty zertteldi. Zań boıynsha parashıýt tehnıkasyn paıdalaný salasyndaǵy mamandar tartylyp, tıisti qorytyndylar, sarapshylardan jaýaptar alyndy. Sonymen qatar qatysýshylardyń jekelegenderi bas áskerı prokýratýra basshylyǵymen týystyq baılanysy bar degen ýájderi negizsiz. Tıisti organdardan málimetter suratylyp, týystyq baılanystyń joqtyǵy anyqtaldy. Basqa málimetter Qylmystyq-protsestik kodekstiń 201-baby talaptaryna saı jarııa etýge jatpaıdy, — dedi prokýror.
Eske salsaq, bıyl shildede Aqtóbede parashıýtpen sekirý oqý-jattyǵýynda kýrsant kóz jumdy.