Aqtóbede kýrsant ólimine qatysty is boıynsha sot aldy tyńdaýy ótti
AQTÓBE. KAZINFORM — Sot otyrysynda aıyptalýshylardyń qorǵaýshylary isti qaıta tergeýge jiberýdi surady. Al jábirlenýshi tarap aıyptalýshylardy úıqamaqtan ýaqytsha tergeý ızolıatoryna aýystyrý týraly ótinish hat joldady.
Aqtóbe oblystyq áskerı sotyna aıyptalýshy Nurjan Aıdenov pen Zamanbek Tólegenge qatysty is tústi. Qylmystyq kodekstiń 453-baby 2-bóligimen sot aldy tyńdaýy bastaldy. Sot otyrysyna taraptardyń bári qatysty.
Aıyptalýshy N. Aıdenovtiń qorǵaýshysy kinálilerdiń bárine birdeı aıyp taǵylmaǵany, sonyń ishinde parashıýtti jınaǵan maman men qoıma jetekshisi jaýapqa tartylmaǵan aıtty. Munyń bárin tekserýi tıis basshy da jaýapqa tartylmaǵan dep esepteıdi.
Aıyptalýshy N. Aıdenov óz qorǵaýshysyn qoldady.
Aıyptalýshy Z.Tólegenniń de qorǵaýshysy dál osy ótinish hatty qoldap, jaýaptylardy túgel anyqtaýdy surady.
Jábirlenýshi tarap bolsa úıqamaqty kúzetpen ustaýǵa ózgertýdi, ıaǵnı, qamaýǵa alýdy surady.
— Anasy qazir tósek tartyp jatyr. Olar nege bostandyqta júr dep suraıdy. Ákesi de sony túsinbeıdi. Bala bıikten qulaǵanda shashylyp qalǵan. Kózi aǵyp ketken. Úıqamaqty qamaýǵa alýǵa aýystyrýdy suraımyz, — dedi jábirlenýshiniń qorǵaýshysy.
Sot aldy tyńdaýy kezinde aıyptalýshylar kópbalaly ekenin, tergeýde qandaı da bir kedergi bolmaǵanyn, ýaqytyly shaqyrýǵa barǵanyn aıtty. Taraptardyń ótinishin tyńdaǵan sot keńesý bólmesine ketti. Sheshimin 5 qańtarda shyǵarady.
Eske salsaq, Aqtóbede kýrsant ólimine qatysty tergeý bıyl qyrkúıekte aıaqtaldy. Maıor men kishi serjant kúdikkke ilikti.
Oqıǵa 15 shilde kúni Aqtóbe oblysy Mártók aýdanyndaǵy josparly oqý-jattyǵý kezinde boldy.