Aqtóbede qurylysty qabyldaý úshin para alǵan ákimdik qyzmetkerleri óz kinásin moıyndady
AQTÓBE. KAZINFORM — Aqtóbe oblysy Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 2 mln teńgeden astam para aldy. Sotta ekeýi de kinásin moıyndady.
Búgin Shalqar aýdandyq sotynda Shalqar aýdanynyń ákiminiń orynbasary Bekturǵan Zaırymbet pen aýdandyq úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Altynbaı Berkimbaevqa qatysty is qaraldy. Ekeýine de Qylmystyq kodekstiń «Para alý» baby boıynsha aıyp taǵyldy.
Aıyptaý aktisine súıensek, byltyr aýdandaǵy Qaıdaýyl aýylyna kireberis jol qurylysyn júrgizý úshin Memlekettik satyp alý konkýrsy ótedi. Konkýrsta «Lıder-NS Stroı» JShS-i jeńimpaz bolyp, ol jumysty qosalqy merdiger «Eýropa NS» JShS-ne tapsyrady. Joba quny — 223 796 648 teńge. Tapsyrys berýshi bólim basshysy Altynbaı Berkimbaev paıda tabýdy maqsat etip, sol qosalqy merdiger mekeme basshysymen kezdesip, oryndalǵan jumys jónindegi aktini esh kedergisiz qabyldaý úshin 200 myń teńge talap etken. Merdiger qorqyp, aqshany bank esepshotyna aýdarady.
Taǵy bir epızod aýdandaǵy Begimbet aýylynda káriz tazartý qurylystaryn salý jumystaryn júrgizetin «El damý yrys» JShS-ne qatysty boldy. Joba quny — 228 224 506 teńge. Shalqar aýdany ákiminiń orynbasary Bekturǵan Zaırambet paıda tabýdy oılap, ony bólim basshysy Altynbaı Berkimbaevqa aıtady. Bólim basshysy óz kezeginde merdigermen sóılesip, memlekettik satyp alý konkýrsyndaǵy somanyń 1%-yn suraıdy. Merdiger jumysty qabyldaý, aqsha aýdarý jumysy qoldarynda turǵan basshylardan qorqyp, kelisim beredi. Sóıtip ózge 2 adamnyń esepshotyna 1 mln teńgeden aýdaryp, qalǵan 300 myń teńge aqshany Altynbaı Berkimbaevtyń úıine aparyp beredi. Berkimbaev aqshanyń bóligin, ıaǵnı, 1 mln teńgeni Bekturǵan Zaırymbettiń qyzmettik bólmesinde qolma qol tabystap, qalǵanyn ózine qaldyrdy.
Іs Shalqar aýdandyq sotynda qysqartylǵan tártipte qaralyp jatyr. Sottalýshylar sot otyrysy kezinde kinány moıyndap, protsestik kelisimge keletinin aıtty.
Eske salsaq, byltyr Aqtóbe oblysy Shalqar aýdandyq bilim bóliminiń basshysy qyzmetin asyra paıdalanǵany úshin sottaldy. Ol mektep dırektorynan aqsha jınatyp, ony jumsap jibergen.