Aqtóbede qurylysqa bólingen qarjynyń teń jartysyna jýyǵy bilim salasyna jumsaldy
AQTÓBE. KAZINFORM – Byltyr qurylys salasyna 88 mlrd bólindi. Bul qarjynyń 35 mlrd teńgesine mektep, balabaqsha salyndy.
Byltyr Aqtóbe oblysynda jalpy qurylys jumystaryna 469 mlrd teńge jumsaldy. Qarjynyń kóbi kommertsııalyq baǵytta bolsa, áleýmettik nysandar salýǵa bıýdjetten 88 mlrd teńge qarastyryldy.
- Barlyq qarjylandyrý kózi esebinen aýdany 1 mln sharshy metr bolatyn turǵyn úıdi paıdalanýǵa berý josparlandy. Jospar artyǵymen oryndalyp, 441,5 myń sharshy metr kóppáterli, 579,6 myń sharshy metr jeke turǵyn úı salyndy. Aqtóbe oblystyq qurylys, sáýlet jáne qala qurylysy basqarmasy bir jylda 89 nysannyń qurylysyn júrgizdi. Onyń ishinde 47 nysan bilim berý salasyna tıesili. Onyń 14-i bıyl qoldanysqa beriledi. Sonymen birge 19 densaýlyq saqtaý, 10 sport nysany da bar, - dedi Aqtóbe oblystyq qurylys, sáýlet jáne qala qurylys basqarmasy basshysynyń orynbasary Aslan Jarasbaev.
Sý tasqyny kezinde jaramsyz bolyp qalǵan 5 nysan qurylysyna 2024 jyly Úkimet rezervinen 4,2 mlrd teńge bólindi. Al byltyr oblystyq bıýdjet rezervinen 1,8 mlrd teńge aýdarylyp, ıgerildi. Atap aıtqanda Oıyl aýylynda 150 oryndyq balabaqsha, 320 oryndyq mektep, Kótibar batyr aýylynda 60 oryndyq mektep, Jaǵabulaq aýylynda 100 oryndyq balabaqsha, Qaratal aýylynda 60 oryndyq mektep salyndy.
- 2023 - 2025 jyldary «Keleshek mektepteri» ulttyq jobasy aıasynda 11 400 oryndyq 14 mekteptiń qurylysy aıaqtaldy. 2024 jyly Aqtóbe qalasynda 2 mektep paıdalanýǵa berildi. 2025 jyly 7 mektep iske qosyldy. 3000 orynǵa arnalǵan 5 mekteptiń qurylys - montajdaý jumystary aıaqtaldy. 2026 jylǵy 31 naýryzǵa deıin pedagogıkalyq quramdy irikteý aıaqtalyp, bilim berý qyzmetimen aınalysýǵa lıtsenzııa alý rásiminen ótedi, - dedi Aslan Jarasbaev.
Aıta keteıik, Aqtóbede qurylysy birneshe jylǵa sozylǵan eki mektepti bıyl qoldanysqa berý josparda bar. Biri - Aqtóbe qalasyndaǵy Shılisaı aýyly, ekinshisi Qandyaǵash qalasy Samal shaǵyn aýdanyndaǵy mektep.