Aqtóbede qurylysy uzaqqa sozylǵan mekteptiń ashanasy istemeı tur
AQTÓBE. KAZINFORM – Mekteptiń jeldetkishi iske qosylmaǵan. Saldarynan ashanada tamaq isteý múmkin emes. Ata-analar sport zal men ashana, oqý bólmelerindegi kemshilikti joıýdy talap etti.
Aqtóbe oblysy Shalqar qalasyndaǵy №5mektep qurylysy 2023 jyly aıaqtalyp, qabyldandy. Alaıda mundaǵy qurylys jumystary durys júrgizilmeı, qazirgi kezde tapsyrys berýshi merdigermen baılanysqa shyǵa almaı otyr. Al ata-analar mundaǵy kemshilikterdi joıýdy talap etti.
– 2018 jyly bastalǵan 320 oryndyq jańa mektep qurylysyna 1,3 mlrd teńge qarjy bólingen. Soǵan qarmastan nysan áli kúnge deıin tolyq aıaqtalmaı, paıdalanýǵa berilgen. Búginde ǵımaratta sport zal, ashana jáne oqý bólmelerinde qurylys kemshilikteri joıylmaǵan. Káriz, sýaǵar jelileri jobaǵa saı emes. Qaýipsizdik talaptary saqtalmaǵan. Mektep aýlasy retke keltirilmegen. Balalarǵa arnalǵan oıyn alańy men sanıtarlyq jaǵdaı qarastyrylmaǵan, - dedi ata-analar úndeýinde.
2025 jyly maýsymda Shalqar aýdandyq sotynda, bıyl tamyz aıynda Aqtóbe oblystyq sotynda keıin taǵy Shalqar aýdandyq sotynda qaýly shyǵarylyp, ákimdik pen prokýratýraǵa jekeshe qaýly berildi. Sot kabınetindegi aqparatqa súıensek, №5 mektepke qatysty birneshe shaǵym qaralǵan. Shalqar aýdandyq sotyndaǵy qaýlyǵa súıensek, mektepte órt dabyly qondyrǵylary jaramsyz kúıde jáne órtke qarsy sý qubyry jasaqtalmaǵany anyqtalǵan. Ákimshilik hattama toltyrylǵanymen mektep basshylyǵy qurylystyń qabyldanbaǵanyn aıtqan. ıAǵnı órt sóndirýshilerdiń de tekserýi men hattamasyn zańsyz dep eseptegen. Sot Shalqar aýdany ákimine kemshilikti joıý týraly jekeshe qaýly shyǵardy.
Aıta keteıik, Shalqar qalasynda ornalasqan mektep janyndaǵy qosymsha qurylys 2018 jyly josparlandy. Sol kezde jobaǵa Shalqar aýdanynyń bilim bólimi tapsyrys berdi. Alǵashynda qyzylordalyq «Atameken» JShS-i merdiger retinde talynyp, qurylysqa 900 mln teńgeden astam qarjy qarastyryldy. Kelisimshart boıynsha mektep 2019 jyldyń sońynda qoldanysqa berilýi tıis edi. Qurylys der kezinde aıaqtalmaı, kemshilikter anyqtalǵan soń aqaýlyq aktisi jasaldy. Sóıtip 2021 jyly mektep qurylysyn aıaqtaý úshin Aqtóbe oblysynyń qurylys, sáýlet jáne qala qurylysy basqarmasy tapsyrys berýshi dep tanyldy. Jobalyq-smetalyq qujatqa qaıta ózgertý engizildi. «Atameken» JShS-i ol kezde boryshkerlerdiń biryńǵaı tiziliminde bolyp, kelisimshart birjaqty úzildi.
– Qaıta konkýrs ótkizilip, túrkistandyq «GradStroıServıs» JShS-i merdiger retinde tanyldy. Kelisim somasy - 529 822 364 teńge. Nysan 2023 jyldyń 26 jeltoqsanynda paıdalanýǵa qabyldandy. Paıdalanýǵa berý barysynda 34 mln teńgeniń jumysy atqarylmaǵan soń sol qarjy keri qaıtaryldy. Sonymen birge tekserý kezinde merdigerden taǵy 37 mln teńge qaıtaryldy, - dep habarlady Aqtóbe oblystyq qurylys, sáýlet jáne qala qurylysy basqarmasy.
Ákimdik jeldetkish jelisin iske qosý úshin elektr togyn tartý jumysy atqarylatynyn aıtty. Alaıda merdiger qazirgi kezde baılanysqa shyqpaı qalǵan. Ári josyqsyz merdiger tiziminde tur. Saldarynan mektepte ashana jumys istemeıdi. Ystyq tamaq tek tasymaldanady. Bul kem-ketikti kimniń jóndeıtini ázirge beımálim.
Eske salsaq, Aqtóbede qurylysy uzaqqa sozylǵan nysandar arasynda mektep, mektep-balabaqsha, sport keshenderi men emdeý orny bar. Al kópqabatty úıler máselesi 2017-2018 jyldardan beri jalǵasyp keledi.