Aqtóbede qurylysy toqtap qalǵan áleýmettik nysandarǵa qaıta qarjy bólindi

AQTÓBE. KAZINFORM – Aqtóbe oblysy boıynsha áli de 12 áleýmettik nysannyń qurylysy prblemalyq dep tanylǵan. Bıyl qurylysty aıaqtap, sport kesheni, turǵyn úıdi qoldanysqa berý úshin bıýdjetten qaıta qarjy bólindi.

Aqtóbe oblysy boıynsha byltyr 17 áleýmettik nysan problemalyq dep tanylyp, bir bóligine jobalyq-smetalyq qujat qaıta jasaldy. Qazirgi kezde onyń 12-i qaldy. Sol nysandardyń qurylysyn aıaqtaýǵa bıýdjetten qaıta qomaqty qarjy bólindi. 

- Óńirimizdegi basty máselelerdiń biri – qurylysy uzaqqa sozylǵan jobalar. Sondaı jobalalardyń biri Baıǵanın jáne Áıteke bı aýdandaryndaǵy turǵyn úı qurylysy. Jobalyq-smetalyq qujatqa túzetý jumysy júrgizildi. Turǵyn úılerdiń qurylysyn aıaqtaý úshin 489 mln teńge baǵyttalyp otyr. Jyl sońyna deıin 40 otbasy turǵyn úımen qamtamasyz etiledi,- dedi Aqtóbe oblystyq Ekonomıka jáne bıýdjettik josparlaý basqarmasynyń basshysy Nurjan Maqsatov. 

Eske salsaq, Áıteke bı aýdanynda 2 qabatty 8 páterli eki turǵyn úıdiń qurylysy 2021 jyly bastaldy. Memlekettik satyp alý kezinde «RB-Stroı» JShS-i jeńimpaz dep tanylǵanymen, qurylys jumysyn júrgizgen kompanııa ózge. Negizi kelisimshart quny - 175 mln teńge. 2021 jyly 29 mln teńge, 32,5 mln teńge ıgerildi. 

Qazirgi kezde Hromtaý aýdanyndaǵy sport kesheni, Qarǵaly aýdanyndaǵy sport kesheni men Óner mektebinde qurylys jumystary júrip jatyr.