Aqtóbede qurylysy birneshe jylǵa sozylǵan eki mektep qashan qoldanysqa beriledi

AQTÓBE. KAZINFORM – Aqtóbe qalasyndaǵy Shılisaı aýyly, Qandyaǵash qalasy Samal shaǵyn aýdanyndaǵy mektepter bıylǵy oqý jylynda bala qabyldamaıdy. Degenmen qurylysty osy jyly aıaqtaý josparda bar.

Aqtóbe oblysynda bilim, densaýlyq saqtaý, sport salasyndaǵy qurylysta problemalyq nysandar áli de bar. Mektep, sport kesheni qurylystyń aıaqtalý ýaqyty belgili bolǵanymen, aýrýhana ǵımaraty boıynsha naqty sheshim shyqpady.

- Problemalyq nysandar qurylysy kezeń-kezeńimen sheshilip kele jatyr. Shılisaıdaǵy mekteptiń qurylys jumystary aıaqtaldy. Qazir qural-jabdyqtarmen jabdyqtaý jumysy atqarylyp jatyr. Keıin oblystyq bilim basqarmasynyń balansyna beriledi. Bul da qosymsha ýaqytty qajet etedi. Bul oqý jylynda emes, qyrkúıekte qoldanysqa berýdi josparlap otyrmyz. Qandyaǵash qalasy Samal shaǵyn aýdanyndaǵy mektep qurylysy kezinde birneshe tekserý jumysy júrip, aıyppul salyndy, merdiger mekeme aýysty. Qazir qurylys qaıta jandandy. Bıyl aıaqtaýdy josparlap otyrmyz, - dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.

Sonymen birge Áıteke bı aýdany Temirbek Júrgenov aýylyndaǵy sport kesheniniń jobalyq-smetalyq qujaty qaıta jasaldy. 2018 jyly bastalǵan qurylys bıyl aıaqtalýy tıis. Densaýlyq saqtaý salasyndaǵy aýrýhana qurylysynyń bolashaǵy ázirge belgisiz.

- Densaýlyq saqtaý basqarmasy nysannyń aldaǵy josparyn dárigerlermen birge anyqtap jatyr. Basqarmanyń málimdeýi boıynsha týberkýlez juqtyrǵandar sany azaıǵan. Nysandy basqa baǵytta salýǵa usynys bermek. Múmkin ınfektsııalyq, bálkim kardıologııa aýrýhanasy bolar, - dep habarlady Aslan Jarasbaev.

Aıta keteıik, Aqtóbede byltyr qurylysy aıaqtalmaı turǵan 11 problemalyq nysan boldy.