Aqtóbede qurylysy bes jylǵa sozylǵan sport kesheni qoldanysqa berildi
AQTÓBE. KAZINFORM — Múgedektigi bar adamdarǵa arnalǵan sport kesheni kúnine 500 adamdy qabyldaı alady. Munda sporttyń 20-dan astam túrimen shuǵyldanýǵa bolady.
Aqtóbe qalasyndaǵy sport kesheniniń qurylysy 2021 jyly bastalyp, qabyrǵasy qalandy. Alaıda qurylys materıaldary qambattap, jumys birneshe jyl boıy toqtap qaldy. Jergilikti ákimdik 2025 jyly qoldanysqa berýdi josparlaǵanymen, keshen búgin ǵana ashyldy.
— Keshenniń jalpy aýmaǵy — 4 855 sharshy metr. Ashyq alańdardaǵy jattyǵýlardy qosa eseptegende kúnine 500 adamǵa deıin qabyldaýǵa qaýqarly. Keshen bazasynda sporttyń 20-dan astam túri damytylady. Paralımpıadalyq baǵyttar qatarynda jeńil atletıka, júzý, otyryp oınaıtyn voleıbol, paýerlıftıng, ústel tennısi, paradzıýdo, oq atý, arbadaǵy tennıs, golbol, bochcha, parataekvondo bar. Sýrdlımpıadalyq sport túrlerine fýtzal, kúres, dzıýdo, badmınton, shahmat, ústel tennısi, júzý, taekvondo jáne basqa da baǵyttar engen. Sonymen qatar paralımpıadalyq emes sport túrleri — toǵyzqumalaq, shahmat, doıby, armrestlıng te qarastyrylǵan, — dedi Aqtóbe oblysy ákiminiń baspasóz qyzmeti.
Aıta keteıik, alǵashynda keshen jobasyna 1,7 mlrd teńge bólindi. Arada 5 jyl ótkende qurylys quny ese esege jýyq qymbattap, 3,2 mlrd teńge jumsaldy. Qurylysqa «Samruk-Kazyna Trust» korporatıvtik qory demeýshi boldy. Munda 106 jumys orny ashyldy.
Aıta keteıik, «Qýat» ınklıýzıvti sport kesheniniń ashylýyna oblys ákimi Ashat Shaharov, Týrızm jáne sport mınıstri Erbol Myrzabosynov pen sportshylar qatysty.
Eske salsaq, alǵashynda bólingen qarjynyń 706 mln teńgesi ıgerilip, qurylys toqtady. Keıin jobalyq-smetalyq qujatqa túzetý engizilip, saraptama qorytyndysy alyndy.