Aqtóbede qurylysy aıaqtalmaı turǵan 11 problemalyq nysan bar

AQTÓBE. KAZINFORM – Qurylysy uzaqqa sozylǵan, toqtap turǵan 11 nysannyń ishinde mektep, aýrýhana men turǵyn úıler bar. 

Qurylys jumysy uzaqqa sozylǵan nysannyń biri – Shılisaı orta mektebi. Mundaǵy qurylys jumystary 2018 jyly bastalyp, áli jalǵasyp jatyr. Bir kezderi merdiger aýysty, qarjylandyrý qıynǵa soqty.

- Shılisaı mektebimen qatar Áıteke bı aýdany T.Júrgenov aýylynda sport kesheni bar. Aşysaı, Oımaýyt aýyldarynda mektep, burynǵy týberkýlezge qarsy dıspanser qurylysy, Oıyl, Alǵa, Hromtaýdaǵy turǵyn úı qurylysy uzaqqa sozyldy. Bıyl bul nysandar qoldanysqa berilýi tıis. Tek týberkýlezge qarsy dıspanserge qatysty suraq bar. Bul qurylys kóp qarjyny talap etedi. Onyń aıaqtalý merzimi naqty emes. Negizgi sebebi belgili. Pandemııa kezinde qurylys materıaldary qymbattap ketti. Sol kezde jobany qaıta túzetýge bergen edik. Biraq bárin bıýdjet kótere bermeıdi. Jospar boıynsha jumys atqarylyp jatyr. Sol kezde 30-den astam nysannyń jobalyq-smetalyq qujaty ózgerdi. Sonymen birge ózge óńirden keletin merdiger kompanııalar da jumysty durys istemeı tur. Olar Memlekettik satyp alýǵa qatysyp, mindetin atqarmaıdy, - dedi Aqtóbe oblystyq Qurylys, sáýlet jáne qala qurylysy basqarmasy basshysynyń orynbasary Aslan Jarasbaev.

Aıta keteıik, Aqtóbede qurylys jumystaryna bıyl 70,7 mlrd teńge jumsalady. Oblysta aýdany 1 mln sharshy metr turǵyn úı salynady. Sonymen birge qazir Prezıdent tapsyrmasy boıynsha oblystyq drama teatrdyń jobalyq-smetalyq qujaty memlekettik saraptamaǵa jiberildi. Qurylys bıyl bastalyp, keler jyly aıaqtalady. Sonymen birge 5 myń oryndyq sport kesheni de Aqtóbe qalasynda salynady. Al 35 myń orynǵa arnalǵan ortalyq stadıon qurylysynyń sheshimi áli shyqpady.

Buǵan deıin habarlaǵanymyzdaı, Aqtóbede qurylysy 10 jylǵa jýyq ýaqyt buryn bastalǵan aýrýhananyń qujaty qaıta jasalady. Oblystyq týberkýlezge qarsy dıspanser endi ınfektsııalyq korpýsy bar oblystyq aýrýhana bolady.