Aqtóbede qurylysy 10 jylǵa jýyq ýaqyt buryn bastalǵan aýrýhananyń qujaty qaıta jasalady
AQTÓBE. KAZINFORM - Oblystyq týberkýlezge qarsy dıspanser endi ınfektsııalyq korpýsy bar oblystyq aýrýhana bolady. Qazir jobalyq-smetalyq qujatqa túzetý engizilip jatyr.
Aqtóbe qalasynyń Jańaqonys turǵyn alabynda qurylysy aıaqtalmaǵan emdeý nysany ashyq-shashyq jatyr. Munda bir nysannyń birinshi qabaty, ózge korpýsynyń irgetasy ǵana qalanǵan.
- Búgingi tańda jobalyq-smetalyq qujattamaǵa túzetý engizilip jatyr. Buǵan deıin 300 tósekti oblystyq týberkýlezge qarsy dıspanseriniń qurylysy bastalǵan. Keıin týberkýlezge qarsy dıspanser qajet bolmaı qalady. Sebebi naýqastardyń sany az. Sóıtip ınfektsııalyq aýrýhanaǵa aýystyrý josparlandy. Biraq el zańnamasy boıynsha tek ınfektsııalyq aýrýhana dep salýǵa bolmaıdy. Endi ınfektsııalyq korpýsy bar oblystyq aýrýhana bolady.
Aýrýhana 300 tósek orynǵa josparlanǵan. Onyń 200 tósek-orny ınfektsııalyq bolady. 100-i eresekterge, 100-i balalarǵa. Al qalǵan 100 oryn ınfektsııalyq aýrýlarǵa tyǵyz baılanysta bolatyn bólimderge arnalady. Bıyl jobalyq-smetalyq qujatqa túzetý bıyl engiziledi. Sodan keıin ǵana qarjy suralady. Bastapqyda 4,5 mlrd teńge boldy. Búginde ájeptáýir aqsha shyǵar,- dedi Aqtóbe oblystyq densaýlyq saqtaý basqarmasy basshysynyń orynbasary Muratjan Qajyǵalıaev.
Memlekettik satyp alý portalyndaǵy aqparatqa súıensek, tapsyrys berýshi - Aqtóbe oblysynyń qurylys, sáýlet jáne qala qurylysy basqarmasy. Sol kezderi basqarma basshysy bolǵan Serik Tólenbergenov jáne "ANTARES PLATINUM" JShS-niń bas dırektory Igor Tarasov kelisimshartqa 2016 jyly qol qoıdy.
Memlekettik satyp alý bir kózden satyp alý tásilimen ótti. Sharttyń jalpy somasy - 4 674 910 238 teńge.
Qurylys 22 aıda bitýi tıis edi. Bul 2018 jyldyń jeltoqsan aıyna dóp kelip tur. Alaıda qurylys basynda jumys toqtap qalyp, “saqaldy qurylys” qataryna qosyldy.
Eske salsaq, Aqtóbede tergeý ızolıatory apatty jaǵdaıda tur. Qylmystyq atqarý júıesiniń № 70 mekemesinde qazirgi kezde adam sany shamadan tys kóp.
