Aqtóbede qurbandyq malyn soıatyn oryndarda meshit qyzmetkerleri men veterınarlar kezekshilik etedi
AQTÓBE. KAZINFORM – Oblysta 26 oryn daıyndaldy. Mal dárigerlerimen qatar polıtsııa, jedel járdem brıgadasy da kezekshilikke shyǵady.
Aqtóbe oblysynda qurbandyq malyn soıýǵa 26 oryn daıyndalǵan. Onyń úsheýi qalada. Aqtóbe qalasynda «Aıbek» agroónerkásip kesheni, «Dala el» JShS jáne «Kaırat 2024» JShS belgilengen. Úsheýi qalanyń úsh bóliginde ornalasqan.
- Mereke kúnderi oblystyq veterınarııa basqarmasy, veterınarııalyq baqylaý jáne qadaǵalaý ınspektsııasynyń mamandary kúsheıtilgen rejımde jumys isteıdi. Mamandar maldy tasymaldaý, soıý, veterınarııalyq-sanıtarııalyq talaptardyń saqtalýy, sondaı-aq halyqtyń sanıtarııalyq qaýipsizdigin qamtamasyz etý baǵytynda turaqty baqylaý júrgizedi. Mal satyp alý kezinde onyń veterınarııalyq anyqtamasyna, syrǵasyna jáne jalpy klınıkalyq jaǵdaıyna nazar aýdarý qajet. Mal tasymaldaýmen aınalysatyn azamattar veterınarııalyq ilespe qujattardy tolyq rásimdeý kerek. Zańsyz mal tasymaldaý men ruqsatsyz saýda oryndarynyń aldyn alý baǵytynda tıisti jumystar júrgizilip jatyr,- dedi Aqtóbe oblystyq veterınarııa basqarmasynyń basshysy Aıbek Sembaı.
Eger mal ıesi óz úıinde qurbandyq shalsa, oǵan shekteý joq. Sonymen birge arnaıy ruqsat almaıdy. Al uıymdastyrylǵan oryndarda mal dárigerinen basqa tártip saqshylary, jedel járdem qyzmeti bolady.
- Meshit qyzmetkerleri dinı rásimniń sharıǵat talaptaryna saı ótýine qatysty nusqaýlyqtar aıtyp, dinı rásimderdi atqarady. Atalǵan oryndarda qyzmet etetin qasapshylarǵa arnaıy semınarlar uıymdastyrylyp, maldy sharıǵat talaptaryna saı soıý jáne sanıtarlyq normalardy saqtaý boıynsha túsindirý jumystary júrgizildi. Qasapshylarǵa arnaıy ruqsat qaǵazdary tabystaldy,- dedi «Nur Ǵasyr» oblystyq ortalyq meshitiniń naıb ımamy Jeksenbaı Torbaev.
Onyń aıtýynsha, onlaın jáne oflaın suranys bergen adamdarǵa etti eriktiler jetkizip beredi. Búginde oblystyq ortalyq meshitte 300-ge jýyq muqtaj adam suranys berip úlgergen. Alaıda keıde qunbandyq eti bárine birdeı jetpeıdi.
- «Nur Ǵasyr» meshitine áli de adamdar kelip jatyr. Alaıda biz ótinish qabyldaýdy toqtattyq. Óıtkeni et jetpeı qalýy múmkin. Al saıt Qurban aıt kúni ashylady. Adamdar sol saıt arqyly da et alý úshin de suranys bere alady. Taldaý kezinde tapsyryspen qurban shalǵanǵa qaraǵanda suranys asyp ketip tur,- dedi Jeksenbaı Torbaev.
Aıta keteıik, Astana qalasynyń Sanıtarııalyq-epıdemıologııalyq baqylaý departamenti Qurban aıt merekesi qarsańynda qurbandyqqa shalýǵa mal soıý, et ónimderin saqtaý jáne tutyný kezinde sanıtarııalyq jáne veterınarııalyq talaptardy saqtaý qajettigin eskertti.
