Aqtóbede Qurban aıt kúni mal bazary jumys istemeıdi
Aqtóbe oblystyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń basshysy Nursulý Berkimbaeva Qurban aıt merekesi qarsańynda jańa qaýly shyǵardy. Qaýlyǵa sáıkes kópshilik, merekelik jáne otbasylyq is-sharalardy, onyń ishinde úı ishinde adamdar kóp jınalatyn basqosýdy ótkizýge tyıym salyndy. Sonymen birge 31 shilde men 2 tamyz aralyǵynda mal bazary jumys istemeıdi.
«Mal soıý oryndaryn anyqtaý jáne qurban shalý rásimderi onlaın formatta uıymdastyrylady. Mal soıýdy tek tapsyrys jáne jetkizý arqyly veterınarlyq sertıfıkat bolǵan jaǵdaıda, kelýshilersiz júrgiziledi. Mal soıý tsehtarynyń barlyq personalyn termometrııa júrgizý úshin medıtsına qyzmetkerin tartýdy jáne nátıjelerin jýrnalǵa engizýdi tapsyramyn. Jedel respıratorlyq vırýstyq ınfektsııa (joǵary temperatýra, jótel, tumaý) jáne basqa da juqpaly aýrý belgileri bar qyzmetkerlerdi jumysqa jibermeý qajet», -dep jazylǵan qaýlyda.
Mal soıý tsehtarynda dezınfektsııalyq jumys kúsheıedi. Veterınarlyq baqylaý jáne qadaǵalaý komıtetiniń oblystyq aýmaqtyq ınspektsııasy, mal soıýmen aınalysatyn kásipkerlik sýbektileriniń basshylary talaptardyń oryndalýyna jaýapty. Sonymen birge oblystyq polıtsııa departamenti bógde adamnyń tseh ishine kirmeýin baqylaıdy.
