Aqtóbede kúnnen qýat alatyn zamanaýı kıiz úı quryldy
AQTÓBE. QazAqparat - Aqtóbede kúnnen qýat alatyn kıiz úı qondyryldy. Kásipker baqtashylarǵa arnalǵan eki qabatty úıge beınebaqylaý kamerasyn qondyryp bergen, dep habarlaıdy QazAqparat tilshisi.
Aqtóbe qalasynyń Sazdy ózeni mańyndaǵy qyrda alty qanatty kıiz úı ornatyldy. Eki qabatty kıiz úıge iri qara baǵatyn baqtashy men onyń kómekshisi qonystanǵan. Ár jylqyda GPS novıgator bar. Ári bıik jerge beınebaqylaý kamerasy qondyrylǵan. Bul jaıylymda júrgen maldy baqylap, qarap, qajet kezde aıdap kelýge yńǵaıly qural.
«Alǵashynda jelden qýat alatyn qondyrǵyny alyp, tájirıbeden ótkizgen edik. Jel qatty soqqan kúni tehnıkalar isten shyǵyp, kúnnen qýat alatyn batareıalarǵa kóshtik. Óte yńǵaıly. Kúnnen qýat alyp, bulaq sýyna mator ornatyp qoıdyq. Qazir sý úzdiksiz kelip tur. Teledıdar qarap, beınekameralar arqyly jaıylymdy qarap otyrýǵa bolady»,- dedi kásipker Erbol Baıjarqynov.
Kúnnen qýat alatyn batareıamen jabdyqtalǵan kıiz úıdiń kerege, ýyq, shańyraǵy bar. Tek plastıkalyq esik qondyrylyp, qabyrǵasy lego kirpishten qalanǵan. Úıdiń ishi kıizben qaptaldy. Úı qysta peshpen jylytylady. «Kıiz úı zamanaýı úıden kem túspeıdi. Jýynatyn bólme, dárethanasy bar. Tómengi qabatta baqtashy tynyǵady. Jatyn bólme jazda salqyn, qysta jyly bolady. Ystyq kezinde salqyndatqysh paıdalanbaımyz»,- dedi kásipker.
Kásipker Erbol Baıjarqynov alty qanatty 10 kıiz úıdi Aqtóbe qalasyndaǵy Nazarbaev zııatkerlik mektebiniń janyna ornatýdy kózdep otyr. Etnoaýyl qala turǵyndary men qonaqtarynyń suranysyna ıe bolatynyna senimdi.
