Aqtóbede quny 234 mln teńgeniń saıabaǵy jaramsyz kúıge tústi
AQTÓBE. KAZINFORM — Qandyaǵash qalasyndaǵy saıabaqta shamdar iske qosylmaǵan, máńgilik alaý oty jaǵylmady, al salynǵan arkalardyń tirekteri qıraı bastady. Ákimdik merdigerdi jóndeý jumysyn júrgizýge mindettedi.
Aqtóbe oblysy Muǵaljar aýdany Qandyaǵash qalasyndaǵy saıabaqtyń jobalyq-smetalyq qujaty 2019 jyly jasaldy. S. Seıfýllın kóshesine salynǵan saıabaq qurylysyna alǵashynda 273 mln teńgeden astam qarjy bólý qarastyrylǵanymen, «Ǵımarat+1» JShS-i 234 mln teńgege qurylys-montaj jumystaryn júrgizýge kelisken. Sol kezde tehnıkalyq qadaǵalaýǵa 3 mln teńgege jýyq, avtorlyq qadaǵalaýǵa 520 myń teńgeden astam qarjy da bólindi. Qurylysy 7 aıda bitýi tıis bolǵanymen, 5 jylǵa jýyq ýaqytqa sozylyp ketti. Saıabaqty 2023 jyly paıdalanýǵa berdi.
— Qazirgi tańda Qandyaǵash qalasynyń ákimdigi saıabaqty kútip ustaý jumystaryn júrgizip jatyr. Qala turǵyndary saıabaqqa birqatar zaqym keltirdi. Atap aıtqanda elektr jeli baǵanalarynyń birshamasy urlanyp, birshamasy isten shyqty. Alleıadaǵy jaryq shamdar, oryndyqtar men qoqys jáshikteri syndy. S. Seıfýllın kóshesi boıyndaǵy saıabaqta anyqtalǵan aqaýlarǵa baılanysty atalǵan nysan boıynsha merdiger uıymǵa birneshe ret eskertý jasalǵan. Alaıda eskertýlerge qaramastan, merdiger tarapynan kemshilikterdi joıý jumystary ýaqytyly oryndalmady. Osyǵan baılanysty merdigerge qatysty qoldanystaǵy zańnama aıasynda talap aryz daıyndalyp, ýákiletti organǵa joldandy. Qazirgi ýaqytta másele baqylaýda jáne tıisti quqyqtyq rásimder júrgizilip jatyr, — dep habarlady Muǵaljar aýdandyq ákimdigi.
Memlekettik satyp alýlar saıtyndaǵy ashyq aqparatqa súıensek, tapsyrys berýshi Muǵaljar aýdandyq sáýlet, qala qurylysy jáne qurylys bólim. Bólim 2019-2023 jyldar aralyǵynda jyl saıyn qarjy aýdarǵan. Naqtylasaq, bıýdjetten 2019 jyly 94,9 mln, 2020 jyly 10 mln, 2021 jyly 45,5 mln, 2022 jyly 30 mln, al 2023 jyly 53,8 mln teńge bólingen.
Eske salsaq, Muǵaljar aýdanyndaǵy páter kezeginde turǵan adamdardy baspanamen qamtý úshin jeke tulǵaǵa 600 mln teńgeden astam qarjy aýdaryldy. Bul zańsyzdyqtan soń is sotta qaralyp, qarjyny keri qaıtarýǵa sheshim shyǵaryldy. Keıin osy is boıynsha qylmystyq is qozǵalyp, tergeý júrip jatyr.