Aqtóbede quny 130 mln teńgeniń saıabaǵy úsh jyldan beri qoldanysqa berilmeı keledi
AQTÓBE. KAZINFORM — Ákimdik merdigerdi josyqsyz dep taný úshin sotqa júgindi. Sot skver qurylysy kezindegi aqaýlardy jóndep, ákimdikke tapsyrý týraly sheshim shyǵardy.
Aqtóbe qalasyndaǵy áskerı ınstıtýt mańynda ornalasqan ushaqtar alańy osydan úsh jyl buryn skverge aınalýy tıis edi. 2023 jyly qurylys aıaqtalmady. Kúni búginge deıin elektr togyn júrgizý, alańdy tazartý jumysy aqsap tur.
— «Megastroıspektr» JShS jumystardy belgilengen merzimde aıaqtamady. Sondyqtan Aqtóbe qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi sotqa «josyqsyz qatysýshy dep taný» týraly talap aryz túsirdi. Sonymen birge tapsyrys berýshi kelisimshart mindettemelerin oryndaý jáne anyqtalǵan aqaýlardy joıýdy surady. Sot skverdi resmı túrde tapsyrý týraly sheshim shyǵardy. Qazir osy protsedýralar júrip jatyr. Nysan tapsyrylmaǵanyna qaramastan Aqtóbe qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi, sanıtarlyq tazalyqqa jaýapty merdigerler kútip ustaý, tazalaý jumystaryn atqardy. Ótken jazda vandaldyq áreketterdiń áserinen búlingen nysandar qalypqa keltirildi, abattandyrý jumystary júrgizildi, — dep habarlady Aqtóbe qalasy ákiminiń baspasóz qyzmeti.
Eske salsaq, joba quny — 130 mln teńge. Osydan eki jyl buryn jazda balalardyń oınap, ushaqtar men tikushaqtar ishin qıratqanyn jazǵan bolatynbyz.
Munda jaǵdaı áli de ózgermedi. Balalar qorshaý arasynan ótip, oınap, ushaqtarǵa sýret salyp, qoqys laqtyryp ketken. Munda tok júrgizilgenimen, jumysy tolyq aıaqtalmaǵan.
Aqtóbe oblystyq PD baspasóz qyzmetinen beınebaqylaý kamerasy týraly suraǵanymyzda ortaq júıege áli qosylmaǵanyn aıtty.
