Aqtóbede kún saıyn vaktsına saldyrǵandar qatary artyp keledi
AQTÓBE. QazAqparat – Aqtóbede aktsııa bastalǵaly vaktsına saldyratyndar qatary artty. Qazirgi kezde kúnine 2 500-3 000 adam ekpe alyp jatyr, dep habarlaıdy QazAqparat tilshisi.
Aqtóbe «sary» aımaqta. Bir táýlikte taǵy 63 adamnan koronavırýs ınfektsııasy anyqtaldy. Olardyń 39-y derttiń sımptomdy túrine shaldyqqan. Aqtóbe oblysynda 193 adam ınfektsııalyq statsıonarda jatyr. 25 naýqas jansaqtaý bóliminde bolsa, onyń 6-y ókpeni jasandy jeldetý apparatyna qosylǵan.
Infektsııalyq kereýet júktemesi 44,7 paıyz, al jansaqtaý bóliminiń júktemesi 37,9 paıyzdy qurady.
«Aqtóbede vaktsına alǵan 32 adamnyń koronavırýs ınfektsııasyn juqtyrǵany anyqtalyp otyr. Onyń 10-y eki komponentti de tolyq alǵan. Keshe vaktsına alǵan on adamnan vırýs anyqtalsa, onyń altaýy birinshi, tórteýi eki komponentin de alǵan. Olar dertti jeńil ótkerip jatyr. Negizi ınfektsııanyń órshýine «delta» shtamy áser etip otyr», - dedi oblystyq sanıtarııa-epıdemıologııa baqylaý departamenti basshysynyń orynbasary Muhtar Serbaev.
Aıta keteıik, óńirge barlyǵy 321 myń doza vaktsına jetkizilgen. Qazirgi 144 myńnan astam adam birinshi, 86 452 adam eki komponentin de qabyldady.
«Emhanalarda 9:00-den 20:00-ge deıin vaktsına qabyldaýǵa múmkindik jasalǵan. Sonymen birge iri saýda orny men bazarda jyljymaly vakınatsııalaý beketi ornatyldy. Úlken ujym emhanaǵa habarlasyp, vaktsına salatyn medıtsına qyzmetkerlerin shaqyra alady. Al adam az bolsa, emhanaǵa barǵan jón. Aktsııaǵa deıin orta eseppen kúnine 1 500 adam, qazirgi kezde 2 500 – 3 000 adam ekpe qabyldap jatyr. Vaktsına jetkilikti», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
