Aqtóbede kún 42 gradýsqa deıin ysıdy
AQTÓBE. QazAqparat - Aqtóbe oblysynda aptap ystyq bir aptadan beri saqtalyp tur. Tótenshe jaǵdaılar qyzmeti shilde aıynyń 8-10 aralyǵynda saq bolýdy eskertedi, dep habarlaıdy QazAqparat tilshisi.
Aqtóbe oblysynyń tótenshe jaǵdaılar qyzmeti 8-10 shilde aralyǵynda aýa temperatýrasy 42 grýsqa deıin kóteriletinin málimdedi. Qatty ystyq týraly habarlama oblys turǵyndarynyń uıaly telefondaryna túsip jatyr. Al bul kezde dárigerler ystyqqa shydamaı, em izdegen naýqastardyń artqanyn habarlady.
«Kún ysyp, aýa temperatýrasy 38-40 gradýsqa deıin kóterildi. Jasy 60-tan asqan adamdardyń qan qysymy artyp, jıi kómek surap keledi, shaqyrtady. Olar dárini mindetti túrde iship júrýi kerek. Bas kıimsiz dalaǵa shyǵýǵa tyıym salynǵan, sýsyz júrý de qaýipti. Kezek kútip otyryp, ǵımarat ishinde aýa jetpeı qınalatyn jaǵdaılar da bar»,- dedi №1 qalalyq emhananyń jalpy tájirıbeli dárigeri Nurlygúl Qanymbaeva.
Dárigerler mereke kúnderi de kezekshilikpen jumys istep otyr. Em izdep kelgenderdiń kóbi qan qysymy kóterilgenin aıtyp, em qabyldaǵan.
«Kókónis, jemis-jıdekpen tamaqtanǵan durys. Toıyp tamaq ishýden bas tartýǵa keńes beremin. Qan qysymy túsip ketetinder de bar. Olar 60/90, tipti 40/60 bolyp keledi. Sý men dárýmenge baı taǵam paıdaly. Úıden shyqpaı, keshki salqyndy kútý kerek»,- dedi Nurlygúl Qanymbaeva.
