Aqtóbede qumar oıynǵa salynǵan áskerı qyzmetshi jumysynan aıyryldy
AQTÓBE. KAZINFORM – 2020-2024 jyldar aralyǵynda qumar oıyn oınaǵan áskerı qyzmetshi sotqa shaǵym túsirdi. Ol qyzmetke qaıta oralýdy surady.
«Batys» óńirlik qolbasshylyǵy basqarmasynyń aǵa ofıtseri ózi qyzmet etken áskerı bólimdi sotqa berdi. Aqtóbe áskerı sotynda anyqtalǵandaı, ol 2020-2024 jyldary qumar oıyn oınaǵan. Bul týraly qyzmettik tekserý kezinde málim bolyp, tekserý komıssııasy byltyr qyrkúıek aıynda jumystan shyǵarý týraly usynys bergen. Áskerı qyzmetshi dál sol kúni bala kútimimen dekrettik demalys alýǵa sheshim qabyldap, ótinish jazady. Ótinish qabyldanyp, sheshim shyǵarylǵanymen kóp uzamaı buıryqtyń kúshi joıylady. Al dekrettik demalysqa shyǵýyna ruqsat bergen jaýapty áskerı qyzmetshiler tártiptik jazaǵa tartylady. Sóıtip 2025 jyldyń qyrkúıek aıynda podpolkovnık jumystan shyǵarylady.
«Batys» óńirlik qolbasshylyǵy basqarmasynyń aǵa ofıtseri bul sheshimge kelispeı, sotqa shaǵym túsirdi. Ózi emes, áıeliniń bás tikkenin aıtty. Al jaýapker «Batys» óńirlik qolbasshylyǵy 5515 áskerı bólimi shaǵymdy qaraýsyz qaldyrýdy, onyń 2025 jyly da sporttyq oıyndarǵa bás tikkenin, shyǵyny jalaqysynan asyp túskenin alǵa tartty.
Іs materıalyna súıensek, áskerı qyzmetshi 2024 jyldyń sáýir aıynda eGov portaly arqyly qumar oıynǵa shekteý qoıǵan. Shekteý bir jylǵa sozyldy. 2025 jyń sáýir aıynan maýsym aıyna deıingi aralyqta qandaı da bir sheshim qabyldamaǵan. Al Batys óńirlik áskerı tergeý basqarmasy osy aralyqty qamtyp, býkmekerlik keńsege suranys jiberdi. Eki aptada 1 mln teńgeden astam aqshasyn uttyrǵanyn anyqtady. Sotta áskerı qyzmetshiniń áıeli voleıbol jáne basketbol oıyndaryna bás tikkenin aıtqanymen, onyń jolyn kórsete almady. Ári telefon nómiri áskerı qyzmetshiniń áıeli emes, óziniń atyna tirkelgen. Ol birneshe ret qarjy uıymdarynan aqsha alyp, ony qumar oıynǵa salyp otyrǵan.
Sot áskerı qyzmetshiniń shaǵymyn qanaǵattandyrmady. Jumystan shyǵarý týraly sheshim ózgerissiz qaldy.
Eske salsaq, byltyr elimizde 200 myńǵa jýyq adam ózine qumar oıyn oınaýǵa tyıym saldy.