Aqtóbede qum kóshkinin toqtata almaǵan merdigerdiń isi sotta qaralyp jatyr
AQTÓBE. KAZINFORM – Merdigerler myńdaǵan túp kóshet ekkenimen, sýarý jumystaryna qajetti uńǵyma qazbaǵan. Sóıtip ekpeniń kóbi qýrap ketti, qum kóshkini toqtamady.
Aqtóbe oblysyndaǵy qum toqtatý jumystary óz nátıjesin bermedi. 2022 jyly bastalǵan jumystyń bári de toqtap tur. Sebebi kóshetter qýrap qaldy. Al tapsyrys berýshi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy merdigerlergi sotqa berdi.
– Yrǵyzdyń Jarma, Baıǵanınniń Barshaqum, Jarqamys eldimekenderinde joba boıynsha 650 mln teńge qaralyp, onyń 500 mln teńgesi merdigerlerge tólendi. Búgingi kúni qum toqtatý úshin ekken aǵashtar qýrap ketken. Bólingen aqsha qumǵa sińgen sýdaı joq. Sharasyzdyqtan sotqa júginip otyrmyz. Al orman sharýashylyǵy mekemesine 18 traktor, kóshet otyrǵyzýǵa arnalǵan 10 tehnıka alyndy. Demek bizde mamandandyrylǵan tehnıkasy bar kásibı mekeme bar. Mamandar tal otyrǵyzý, olardy baptaýmen aınalysady. Nege biz qarjyny jeke sharýashylyqtarǵa beremiz? Nege orman sharýashylyǵyna bermeske? - dedi Aqtóbe oblystyq máslıhatynyń depýtaty Qudaıbergen Bekenov sessııa otyrysynda.
Shyn máninde Aqtóbe oblysynda 19 aýyldy qum basý qaýpi tónip tur. Ásirese Baıǵanın, Yrǵyz, Temir jáne Shalqar aýdandarynda qum kóshkini tirkeldi. Sol kezde aldymen Yrǵyz aýdany boıynsha 5 eldimekenge arnalǵan joba daıyndaldy. Jarma aýylyndaǵy qum toqtatý jumystaryna «Aqtobe green garden» JShS jaýapty boldy. Memlekettik satyp alý konkýrsy 2022 jyly aqpanda ótip, 24,2 mln teńge qarastyryldy. Búginde ornyń 7,7 mln teńgesi ıgerilgen. Sonymen birge sol jyly maýsym aıynda taǵy 119, 7 mln teńge qarastyrylyp, qarjynyń bári ıegerilgen. Alaıda nátıje joq.
– Merdiger kompanııa Jarma eldi mekeniniń 5 gektar aýmaǵyna 35 myń túp aǵash otyrǵyzdy. Alaıda aǵashtardyń kútimi jasalmady, shyǵymy 5 paıyzdan tómen, sýarý júıesi ornatylmaǵan, 3 sý uńǵymasy qazylmaǵan. Atalǵan kemshilikter boıynsha keltirilgen zalaldy bıýdjetke qaıtarý úshin materıal sotqa joldandy jáne óndirip alý rásimi bastaldy, - dep habarlady Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy.
Ekinshi joba Baıǵanın aýdanynda qolǵa alyndy. Barshaqum jáne Jarqamys aýyldaryndaǵy qum toqtatý jobalarynyń jalpy quny — 504 mln teńge. «Garant Story-K» JShS-men aradaǵy kelisimshart 2023 jyly jasaldy. Búginde qarjynyń 362, 5 mln teńgesi ıgerilgen. Jumys bıyl maýsymda tekserilip, kemshilikter anyqtaldy.
– Barshaqum eldimekenindegi 3 ýchaskede qamys qorshaý ornatylmaǵan, ekpe materıaldarynyń ósimi óte tómen, sýarý jumystary júrgizilmegen. Jarqamystaǵy 6 ýchaskede de qamys qorshaýlary ornatylmaǵan, ósim deńgeıi óte tómen. Eskertýler boıynsha tıisti sharalar qabyldanbaǵan. Oryndalmaǵan jumystarǵa da aqsha aýdarylǵan. Osyǵan baılanysty eki joba boıynsha anyqtalǵan buzýshylyqtardy qalpyna keltirý maqsatynda sotqa talap aryz joldandy. Іs qaralyp jatyr. Aqtóbedegi orman sharýashylyǵy mekemelerinińi materıaldyq-tehnıkalyq bazasy nyǵaıtý úshin bıyl 683 mln teńge qarajat bólinip, qajetti tehnıka satyp alyndy. Qum toqtatý jobalaryn tıimdi iske asyrý úshin jumysty orman sharýashylyǵy mekemelerine bekitý jáne qarjylandyrý oryndy dep sanaımyn, - dep habarlady Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Isataı Espaǵanbetov.
Sot kabınetindegi aqparatqa súıensek, Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy oblystyq mamandandyrylǵan aýdanaralyq ekonomıkalyq
sotyna talap aryz túsirgenimen, isti qaraýsyz qaldyrý týraly uıǵarym shyǵaryldy. Keıin talap qoıýshy basqarma 5 068 500 teńgeni óndirý týraly qosymsha sheshim shyǵarýdy surady. Alaıda bul aryz da qanaǵattandyrylmady.
Sonymen birge «Aqtobe green garden» JShS-i de Aqtóbe oblystyq tabıǵı resýrstar jáne tabıǵatty paıdalanýdy retteý basqarmasyn sotqa berdi. Іs materıalyna súıensek, aldymen negizgi kelisimshartqa qol qoıyp, keıin qosymsha kelisim jasalǵan. 2022 jyly jumys bastalyp, jumys 2024 jyldyń 31-jeltoqsanynda bitýi tıis. Merdiger tapsyrys berýshiden 13 207 743 teńgeni óndirýdi surady. Osy somada jumys qabyldanbaı, aqshasy aýdarylmaǵan. Bul qarjyǵa qubyr tartylyp, tamshylap sýarýǵa arnalǵan qurylǵy alynǵan, sekseýil egilgen. Tek 24 metrlik uńǵyma qazǵanymen, sý shyqpaǵan. Al jobalyq-smetalyq qujatta 15 metrden sý shyǵady dep boljanǵan. Merdiger sotta ekpeler qýrap qalmaýy úshin sýdy tasymaldaǵanyn aıtty. Al tapsyrys berýshi kelisimshart talaptary oryndalmaǵanyn, uńǵyma qazylmaı, tamshylap sýarý iske qosylmaǵanyn, sekseýildiń bir bóligi qýrap, qosymsha egý jumystary júrgizilmegen aıtty. Sot talap aryzdy qanaǵattandyrmady.
Buǵan deıin habarlaǵanymyzdaı, Aqtóbedegi eldimekenderde 500 myń kóshet egý mindeti bar. Al orman alqabyn molyqtyrý jospary — 60 mln 289 myń túp ekpe materıal. Aqtóbe oblystyq tabıǵı resýrstar jáne tabıǵat paıdalanýdy retteý basqarmasynyń bólim basshysy Erkebulan Talasbaev kógaldandyrý, abattandyrý jáne qum toqtatý jumystarynyń jaıyn aıtyp berdi.