Aqtóbede qulaǵan baǵanalardyń ornyna jańasyn ornatý jumysy bir aptaǵa sozyldy

AQTÓBE. KAZINFORM – Muǵaljar aýdanynyń Sabyndykól aýylyna jaryq berildi. Mundaǵy qulaǵan baǵanany qalpyna keltirý jumysy bir aptaǵa sozyldy. 

Jańa jyldan bastap Muǵaljar aýdanynyń 6 aýylynda jaryq alma-kezek sóndi. Munyń sebebi – elektr symyna dıametri 15-20 sm bolatyn muz qatyp, baǵanalar qulaýy.

- Sabyndykól aýylynda 79 baǵana qulaǵan bolatyn. Qazirgi kezde baǵanalar jańartylyp, ornatyldy. Symy da tartylyp, jaryq berildi. Aýylda 4 qańtar kúni jaryq sónip, turǵyndar generator paıdalandy. Sýmen qamtý úshin uńǵymaǵa qýattylyǵy joǵary generator berildi,- dedi Muǵaljar aýdanynyń ákimi Darhan Ermaǵambetov.

Eske salsaq, Aqtóbede kún raıy kúrt ózgerip, Muǵaljar aýdanyndaǵy Juryn, Qarakól, Sabyndykól, Aşysaı, Qumsaı, Aqsý aýyldarynda elektr symyn tartý jumysy júrgizildi. «Energosıstema» JShS-de 30 jeltoqsan jáne 8 qańtar aralyǵynda kúsheıtilgen rejımde jumys atqarý bekitildi.