Aqtóbede kúkirtti sýtek ısinen allergııa derti ýshyqty
AQTÓBE. QazAqparat - Aqtóbe qalasynyń turǵyndary kúkirtti sýtekten allergııaǵa shaldyǵyp jatyr. Adamdar oqystan jótelip, tynysy taryldy, dep habarlaıdy QazAqparat tilshisi.
Aqtóbe qalasyndaǵy jaǵymsyz ıiske tunshyqqan turǵyndar bılikten sheshimin surap, jınalys ótkizgen bolatyn. Buǵan deıin habarlaǵanymyzdaı , zııandy qaldyqtardy atmosferaǵa tastaıtyn 20-dan astam kásiporyn anyqtalyp, keıbiriniń jumysyn toqtatý týraly usynys jasaldy. Qazirgi kezde dárigerler allergııaǵa shaldyqqandardyń kúrt artqanyn aıtyp, dabyl qaǵyp otyr. Adamdar oqystan jótelip, dárigerlerdiń kómegine júginip jatyr.
«Kúkirtti sýtek atmosferaǵa tastalǵan kúni jedel járdemge qońyraý shalǵandar kóp boldy. Buryn allergııamen aýyrmaǵan, mundaı derti anyqtalmaǵan adamdar oqystan jótelip, ózderin nashar sezindi. Qazirgi kezde Aqtóbede kún ystyq, shaqyrtýlar sany kóbeıdi. Demalys kúnderi 1 200-den astam adam qońyraý shalyp, kómek surady. Qan qysymynyń kóterilýi jıiledi. Salqyndatqyshtyń kesirinen balalardyń ókpesi qabynyp jatyr»,- dedi Aqtóbe qalalyq jedel járdem beketi bas dárigeriniń orynbasary Dastan Netalıeva.
