Aqtóbede qýǵyn-súrginge ushyraǵandardyń qylmystyq isimen tanysýǵa múmkindik bar

AQTÓBE. QazAqparat - Aqtóbe oblystyq ishki ister departamentindegi muraǵatta qýǵyn-súrginge ushyraǵandardyń 13 myńnan astam qylmystyq isi saqtaýly. Atylyp, uzaq jylǵa sottalyp, áskerı tutqynda bolyp, jer aýdarylǵandar týraly aqparat 2014 jyldan beri  saıası qurbandardyń týǵan-týystaryna tanysý úshin beriledi, dep habarlaıdy QazAqparat tilshisi.     

Aqtóbe oblystyq ishki ister departamentiniń arnaıy memlekettik muraǵatyndaǵy aqtaýǵa jatpaıtyn, qýǵyn-súrginge ushyryp, sotpen aqtalǵandardyń jáne Germanııada áskerı tutqynda bolǵandardyń qylmystyq isteri saqtaýly. Bul qujattyń bári buǵan deıin Ulttyq qaýipsizdik komıtetiniń oblystyq departamentinde bolǵan edi. 2014 jyly oblystyq ishki ister departamentiniń arnaıy muraǵatyna berilip, nátıjesinde aqtóbelikter iz-túzsiz joǵalǵan ata-analaryn, baýyrlaryn izdeýge múmkindik aldy.

«Aqtaýǵa jatpaıtyn azamattarǵa qatysty ister adamdardyń qylmys jasaǵanyn aıǵaqtaıtyn qujattardan turady. Otandy satý, qarapaıym adam men áskerı tutqyndarǵa kúsh qoldaný, qarýly top uıymdastyrý, olardy qoldaý, kisi óltirý jáne ózge de qylmysqa qatysý. Mine, osy aıtylǵandar aqtalmaıtyn isterdi qamtıdy. Olardyń jalpy sany  617. Al qýǵyn-súrgin jyldary sottalyp, keıin aqtalǵandarǵa qatysty 9936 qylmystyq is muraǵatta saqtalǵan. Úshinshi baǵyt, ıaǵnı, Germanııada tutqynda bolyp, óz eline oralǵandar týraly 2520 is tirkeýli. Qylmystyq qujattardy adamdardyń esepke alý kartochkasy, tutqyndalǵan ýaqyty men orny, tutqynda ustaý jaǵdaıy jazylǵan. Keı adamdardyń fotosy bar», - dedi oblystyq ІІD muraǵaty, aqparattyq-saraptamalyq ortalyǵynyń aǵa ınspektory Amangúl Іzbasarova.

Qýǵyn-súrginge ushyrap, iz-túzsiz ketkenderdi, áskerı tutqynda bolǵandardy qazir týystary izdep, taýyp alyp jatyr. 2016 jyly barlyǵy 159 adam týraly málimet suraldy. Onyń tek 32-si boıynsha qylmystyq is qujattary tabyldy. Bıyl qýǵyn-súrginge ushyrap, áskerı tutqynda bolǵan 10 adam týraly qujat suranys boıynsha týystaryna tanysýǵa berildi.

«Ótken jyly jaqyn jáne alys shetelden 21 ótinish tústi. Germanııa, Kanadadan túsken aryzdar boıynsha adamdar izdestirilip, málimetter muraǵattan tabyldy. Eger Aqtóbe oblystyq ІІD muraǵatynan tabylmasa, basqa oblystarǵa, elderge suranys jasaı alamyz. Keıde repressııaǵa ushyraǵandardyń aty-jónderi durys jazylmaıdy, áripteri ózgerip ketedi. Qazir qolymyzdaǵy qylmystyq isterdegi muraǵat qujattaryn memorial.kz saıtyna tirkep jatyrmyz. Saıtta tek aty-jóni, jalpy anketasy bolady»,- dedi Amangúl Іzbasarova.