Aqtóbede qýattylyǵy 700 MVt bolatyn elektr stantsııasy salynady
AQTÓBE. QazAqparat - Ulybrıtanııalyq ınvestorlar qýattylyǵy 700 MVt bolatyn elektr stantsııasyn salady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev pen Ulybrıtanııa halyqaralyq saýda mınıstrliginiń taý-ken sektoryndaǵy yntymaqtastyqty damytý jónindegi keńesshisi Ros Lýnda jáne «Azura» kompanııasynyń halyqaralyq ınvestorlar tobynyń ókili Morıs Frosh kezdesý ótkizdi.
Aqtóbe oblysy ákiminiń baspasóz qyzmetiniń habarlaýynsha, kezdesý kezinde birneshe ınvestıtsııalyq joba usynyldy.
«Elbasy Nursultan Nazarbaevtyń tapsyrmasyna sáıkes aımaqta ınvestorlardyń senimdi ári jaıly jumys isteýi úshin barlyq jaǵdaı jasalyp jatyr. Memleket jeńildikter usynyp, ınvestorlardyń quqyqtaryn qamtamasyz etedi jáne qorǵaıdy. Biz yntymaqtastyq qarym-qatynasty árdaıym qoldaımyz jáne bizdiń oblysta iske asyrýǵa bolatyn jobalarǵa qajetti kómek kórsetýge daıynbyz», - dedi oblys ákimi Berdibek Saparbaev.
Aqtóbe oblysynyń ákimdigi men ınvestorlar qýattylyǵy 700 MVt bolatyn elektr stantsııasyn salý kelisimin jasady.
Investorlar jobany qarasha aıynda qarjylandyrady. «Biz osy jobany bastaýǵa daıynbyz. Bul biz úshin óte mańyzdy joba»,- dedi Morıs Froch. Negizinen «Azura International» kompanııasy energetıkalyq resýrstardy, mıneraldar men aýylsharýashylyq ónimderin satýǵa jáne saýdalaýǵa mashyqtanǵan. Sonymen qatar, qazbalardy barlaý jáne óndirý, keńes berý qyzmetterin atqarady. 
