Aqtóbede KT men MRT apparattaryn jóndeıtin maman men ortalyq joq
AQTÓBE. QazAqparat -Aqtóbede medıtsınalyq klaster damyp jatyr. Biraq buzylǵan KT men MRT apparattaryn jóndeıtin maman joq, dep habarlaıdy QazAqparat tilshisi.
Aqtóbe medıtsınalyq klasteriniń bes aılyǵy qorytyndylandy. Bıyl adamdardyń ómir súrý uzaqtyǵy 8 aıǵa artyp, 73 jas 5 aıǵa jetti. Sonymen qatar, óńirde bala týý kórsetkishi artty. ıAǵnı, Aqtóbede tabıǵı ósim bar. Jyldyń alǵashqy bes aılyǵyn qorytyndylaǵan oblystyq densaýlyq saqtaý basqarmasynyń basshysy Áset Qalıevtiń aıtýynsha, Aqtóbege BQO, Mańǵystaý, Atyraý, Qyzylorda oblystarynan kelip emdelýshiler kóp. Barlyǵy 800-den astam adamǵa joǵary tehnologııalyq qyzmet kórsetildi. Kezdesý kezinde aqtóbelik dárigerler KT men MRT apparattaryn jóndeýdiń qıynǵa túsetinin aıtyp berdi. Jylyna servıstik qyzmet kórsetýge 7 mıllon teńge bólinse de, bul azdyq etip tur.
«Bul suraqtyń sheshimin tabý úshin qarjylandyrý júıesin ózgertý kerek. Jergilikti bılik retinde suraqtyń der kezinde sheshilgenin, ıaǵnı, MTR, KT apparattardyń jumys istep turǵanyn qalaımyz. Al apparattardyń úzdiksiz jumys isteýi úshin mamandandyrylǵan servıstik qyzmet kórsetý kompanııasy bolýy kerek. Bizde mamandar da joq. Keıde adamdar emhana, aýrýhanada apparattar isten shyqqan dep shaǵymdanady. Sebebi, temir de isten shyǵady. Bizde onyń qosalqy bólshekteri joq», - dedi oblys ákimi Berdibek Saparbaev.
Qazirgi kúni qymbat apparattardy jóndeýge respýblıkalyq bıýdjetten ǵana qarjy bólinedi.
«Densaýlyq saqtaý mınıstrligi qarjy bólip, apparat jóndeý máselesin baqylaýda ustaıdy. Ekonomıst maman retinde bul júıege qarsymyn. Sebebi, oblystaǵy apparatty jóndeýge oblys qarjy bólýi kerek. Naýqas Aqtóbede, al másele Astanada sheshiledi», - dedi B.Saparbaev.
