Aqtóbede krannan qulaǵan jumysshynyń qalaı mert bolǵanyn tekserýde
AQTÓBE. QazAqparat - Aqtóbedegi «Aqtóbe-Sáýlet» JShS-niń jumysshysy Oleg Olhov qaza tapty. Krandy jóndemek bolǵan jumysshy bıiktikten qulap ketken, dep habarlaıdy QazAqparat tilshisi.
Qurylys kompanııasynda qaıǵyly jaǵdaı tirkeldi. 47 jastaǵy elektrshi krannan qulap, mert boldy. Qazirgi kezde Aqtóbe oblystyq eńbek ınspektsııasy basqarmasy arnaıy komıssııa quryp, tekserý jumystaryn bastady.
«Qurylys kompanııasy bir jumysshynyń qaza bolǵanyn habarlady. Aldaǵy ýaqytta komıssııa tekserip, oqıǵanyń naqty sebebin anyqtaıdy. Bul jerde jumysshy álde jumys berýshi kináli me degen suraq qaralady. Keıin tekserý qorytyndysy quqyq qorǵaý organdaryna joldanady»,- dedi ınspektor Danııar Sarybaev.
Aıta keteıik, «Aqtóbe-Sáýlet» qurylys kompanııasy jumysshynyń qazasy týraly eshqandaı aqparat taratpady.
Foto: polit.ru
