Aqtóbede QR chempıony Dáýlet Haırollanyń ólimine qatysty sot bastaldy
AQTÓBE. QazAqparat – Aqtóbe oblystyq qylmystyq ister jónindegi mamandandyrylǵan aýdanaralyq sotynda Qazaqstannyń 3 dúrkin chempıony Dáýlet Haırollanyń ólimine qatysty sot otyrysy bastaldy, dep habarlaıdy QazAqparat tilshisi.
Aqtóbe oblysynyń qylmystyq ister jónindegi mamandandyrylǵan aýdanaralyq sotyna S.J.Sadýovqa qatysty Qylmystyq kodekstiń «Qarýdy zańsyz satyp alý, saqtaý, tasymaldaý nemese alyp júrý», «Qylmysqa daıyndalý jáne qylmys jasaýǵa oqtalý», «Adam óltirý», «Buzaqylyq nıetpen eki nemese odan da kóp adamdy óltirý» baptary boıynsha qylmystyq is tústi.
«Aıyptaý aktisine sáıkes, Sadýov atys qarýyn zańsyz alyp júrgen, tasymaldaǵan jáne saqtaǵan. Sonymen qatar, bıylǵy 4 aqpan kúni túsinispeýshilik saldarynan Sadýov alkogoldik mas kúıde atys qarýynan J.-ǵa oq atqan, J. atylǵan oqtan qutyla alǵan. Artynsha, Sadýov jábirlenýshi H.-ǵa qarýdy baǵyttap, ekinshi ret oq atqan. Keltirilgen dene jaraqatynan sońǵysy qaza boldy. Qylmystyq is aldyn ala tyńdaý satysynda», - dep habarlady Aqtóbe oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmetinen.
Búgin karateden Qazaqstan kýbogynyń úsh dúrkin chempıony, marqum Dáýlet Haırollanyń týǵan-týystary sot aldyna jınalyp, bir emes, birneshe kúdiktiniń iske jaýapty ekenin aıtty.
«Ol jerde bir emes, birneshe kúdikti bar. Sondyqtan biz isti qaıta tergeýge jiberip, qylmys jan-jaqty qaıta qaralsa deımiz. Bárin jaýapqa tartýdy suraımyz. Kýágerlerdiń aıtýynsha, kúdiktini qaıramaǵanda ol oq atpas edi. Jan-jaǵyndaǵylar «at, at!» dep aıtqan eken», - dedi Dáýlet Haırollanyń apasy Jadyra Aıjanova.
