Aqtóbede qoıý tútinge baılanysty kópqabatty turǵyn úıden 45 adam evakýatsııalandy

ASTANA. KAZINFORM – Aqtóbe gaz qurylǵysynda qaraýsyz qaldyrylǵan tamaqtyń saldarynan 45 adam evakýatsııalandy, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń habarlaýynsha, oqıǵa Aqtóbe qalasynyń Almaty aýdanynda bolǵan. Toǵyz qabatty turǵyn úıde tamaqtyń baqylaýsyz qalýynan birinshi qabattaǵy páterde tútin paıda bolǵan.

Tótenshe jaǵdaılar mınıstrliginiń ókilderi 45 adamdy, onyń ishinde 25 balany evakýatsııalady. Tútin seıildi, zardap shekkender joq.

«TJM azamattardan turmysta órt qaýipsizdigi erejelerin saqtaýdy suraıdy»,-delingen habarlamada.

Osyǵan deıin Aqmola oblysynda astyq saqtaıtyn qoıma órtengeni týraly habarlaǵan edik.