Aqtóbede qoı júnin óńdeıtin zaýyt salynady

AQTÓBE. KazAqparat - Aqtóbede qoı júnin qabyldap, jylý saqtaýǵa arnalǵan materıal daıyndaıtyn zaýyt salynady. Bul qurylysty ıtalıandyq ınvestorlar qolǵa aldy, dep habarlaıdy QazAqparat tilshisi.

Aqtóbe oblysynyń ákimi Eraly Toǵjanov «KazFeltec» JShS quryltaıshysy Áset Tileýovpen jáne ıtalıandyq «Cormatex» kompanııasynyń ókili Lıýka Kýerchımen iskerlik kezdesý ótkizdi. Kezdesý barysynda kásiporyn jetekshileri úı men basqa da nysandarda jylý saqtaýǵa arnalǵan qurylys materıalynyń artyqshylyǵy týraly aıtty. Shıkizat - qoı júni. Taraptar zaýyt salý jáne iske qosý konsortsıýmyn qurý týraly kelisimge qol qoıdy.

Qurylys materıaldary qylshyqty júnnen jasalady. Qazirgi tańda Aqtóbe oblysynda jyl saıyn 3,5 myń tonna jún jınalyp, suranysqa ıe bolmaı qalyp jatyr. Oblys ákimi jobaǵa oń baǵa berip, jergilikti atqarýshy organ tarapynan qoldaý bolatynyn aıtty. Ásirese jún jınaýǵa qol ushyn sozbaq.
«Árbir aýdanda jınaqtaý pýnktterin ashý múmkindigi qaralatyn bolady. Satyp alýdy júıeleý qajet. Jergilikti turǵyndardan satyp alýǵa basymdyk beriledi», - dedi Eraly Toǵjanov.
Investıtsııanyń jalpy kólemi 10 mln eýrony quraıdy. Aqtóbe qalasynda qurylysqa daıyndyq bastaldy. Alǵashqy ónim 2023 jyldyń kúzinde shyǵarylady. Óndiris iske qosylǵannan keıin búkil oblys boıynsha shıkizat qabyldaý pýnktterin eseptemegende, zaýyttyń ózinde 20-dan astam jańa turaqty jumys orny ashylady.