Aqtóbede qoı júnin qabyldaý, óńdeý zaýyty ashylady

AQTÓBE. QazAqparat –Memleket basshysy Qasym-Jomart Toqaevtyń aýyl sharýashylyǵy salasyn damytý tapsyrmasyna sáıkes Aqtóbe oblysynda mal júnin óńdeýge qatysty jańa joba qarqynmen júzege asyrylýda, dep habarlaıdy QazAqparat.

Jylý oqshaýlaǵysh materıaldar shyǵaratyn zaýyt salýǵa 4 mlrd 321 mln teńge kóleminde ınvestıtsııa tartylyp otyr. Ónim – ekologııalyq taza. Zaýyt shıkizat retinde qoı júnin paıdalanbaq.

Ótken jyly kúzde jergilikti ákimdik zaýyt salatyn seriktestik pen ıtalııalyq kompanııamen ózara kelisimge qol qoıǵan bolatyn. Búginde kásiporynnyń qurylysy júrip jatyr.

Kásiporyn dırektory Erlan Jańabergenovtiń aıtýynsha, zaýyt kelesi jyly iske qosylmaq. Alaıda qurylystyń aıaqtalǵanyn kútpeı, jún qabyldaý pýnktin ashý sheshilgen.

«Bul máselege qatysty qazir bizge ózge óńirlerden de habarlasyp jatqan sharýalar bar. Jalpy zaýyt ashylsa, shıkizat óndirýde eshqandaı másele bolmaıdy», — deıdi Erlan Jańabergenov.

Byltyr qyrkúıek aıynda zaýyt salý jobasy talqylanǵan jıynda oblys ákimi Eraly Toǵjanov óńirde qoı júnin óńdeıtin kásiporynnyń joqtyǵynan jyl saıyn 3,5 myń tonna jún suranysqa ıe bolmaı otyrǵanyn aıtty. Óńirde 1 mln. 400 myń bas qoı tirkelgen.

Odan bólek bıyl «Aýyl amanaty» jobasy aıasynda oblystyń 500-ge jýyq turǵyny nesıege qoı alýǵa nıetti. Osylaısha jyl sońyna deıin qoı sany taǵy 18 myńǵa artpaq.

Oblystyq Aýyl sharýashylyǵy basqarmasynyń bólim basshysy Panabek Bımuratovtyń aıtýynsha, keńes zamanynda jumys jasaǵan «Júndi bastapqy óndeý» zaýyty toqtap qalǵan soń júndi ótkizý kúrdeli máselege aınaldy.

«Oblys boıynsha jyl saıyn shamamen úsh myń tonna qoı júni óndiriledi. Sońǵy jyldary sharýalar óndirgen júnderin kezdeısoq satyp alýshylarǵa ótkizip keldi. Qazirgi ýaqytta ol satyp alýshylar da óz jumysyn toqtatyp, sharýa qojalyqtary júndi órtep nemese jerge kómip tastap, qutylyp júr. Júnge suranystyń azaıýy jeńil ónerkásip salasynda jasandy júnniń (sıntepon) keńinen paıdalanylýy bolyp otyr dep oılaımyn. Aldaǵy ýaqytta oblysta ekologııalyq taza jylý oqshaýlaǵysh materıaldar shyǵaratyn zaýyt iske qosylsa, bul kúrdeli máseleniń oń sheshimin tabatyndyǵyna senimim mol», — deıdi Panabek Bımuratov.

Erlan Jańabergenovtiń sózinshe, zaýyt jylyna 2100 tonna daıyn ónim shyǵaratyn bolady. Sondaı-aq 40 adam jumyspen qamtylady.

«Kásiporynda qaıta óńdeý protsesi eki kezeńnen turady: birinshisi — júndi jýý, keptirý jáne ártúrli qospalardan tazartý. Ekinshisi — daıyn ónimderdi aerodınamıkalyq jolmen óndirý. Jumystardyń barlyǵy ıtalııalyq tehnologııalarmen júzege asyrylady. Bul tehnologııa negizinen, júndi ǵana emes, sonymen qatar makýlatýrany, mysaly, zyǵyr sııaqty ósimdik talshyqtaryn óńdeýge múmkindik beredi», — deıdi kásiporyn basshysy.

Zaýytqa barlyq qajetti qural-jabdyqtar Italııadan jetkiziledi.