Aqtóbede qosymsha ımmýndaýdan keıin qyzylsha juqtyrǵandar sany azaıdy

AQTÓBE. KAZINFORM — 2024 jyly 3700-den astam adam aýyrsa, byltyr tek 32 derek tirkeldi. Óńirde kishkentaı balalarmen qatar jasóspirimder de qosymsha ekpe qabyldady. 

Aqtóbe oblysynda 2023-2024 jyldary qyzylsha men kókjótel juqtyrǵandar kóp boldy. Máselen 2023 jyly 2179 adamnan, 2024 jyly 3772 adamnan juqpaly ınfektsııa anyqtaldy. Sonymen birge kókjótelge shaldyqqandar tórt ese artty. Sondyqtan óńirde qosymsha vaktsına salý týraly sheshim qabyldandy.

— Oblysta 6 aıdan 11 aıǵa deıingi balalardy, 2-4 jastaǵy balalardy, medıtsına qyzmetkerlerin ımmýndaý, sonymen qatar 18 jasqa deıingi jastardy ilespeli ımmýndaý jumystary júrgizildi. Byltyr qyzylsha men kókjótel aýrýynyń epıdemıologııalyq ahýaly jaqsardy. Bir jylda tek 32 adamnan qyzylsha anyqtaldy. Degenmen qazirgi kúni qyzylsha aýrýynyń epıdemıologııalyq jaǵdaıy bizdi alańdatyp otyr. Óıtkeni bıyl qaıta ósimi baıqaldy, — dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Koıshanova.

Sonymen birge keıingi kezde óńirde juqpaly teri aýrýlary, ıaǵnı dermatomıkoz ben qyshyma juqtyrǵandar tirkeldi. Kóbi ıt pen mysyq asyraıtyndardan anyqtaldy. Jeke gıgıena erejelerin saqtamaǵan, ýaqtyly em almaǵan naýqas balalarmen aralasqandar da dáriger kómegine júgindi.

— Oblystaǵy juqpaly aýrýlar oshaǵyna 726 tergep-tekserý jumystary júrgizildi. Barlyǵy 161 ákimshilik shara qoldanylyp, 8 mıllıon tenge kóleminde aıyppul salyndy, — dedi Raıhan Qoıshanova.

Aıta keteıik, Elordada qyzylsha aýrýyn juqtyrý jaǵdaıy údep barady. Olardyń basym bóligi balalar arasynda anyqtalyp jatyr. Dúnıejúzilik densaýlyq saqtaý uıymynyń derekterine sáıkes, ınfektsııanyń taralýyn toqtatý úshin halyqtyń keminde 95 paıyzy ekpe alýy qajet.