Aqtóbede kóshi-qon qyzmetterin kórsetetin ortalyq ashyldy
AQTÓBE. QazAqparat - Elbasymyzdyń Joldaýyn oryndaý jáne «Aqtóbe - adaldyq alańy» jobasyn júzege asyrý maqsatynda Aqtóbe qalasynda kóshi-qon qyzmetterin kórsetetin ortalyq ashyldy, dep habarlaıdy QazAqparat.
QR memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń málimetinshe, endi eńbek mıgranttaryna qajetti memlekettik qyzmet túrlerin «bir tereze» qaǵıdaty boıynsha bir jerden alýǵa múmkindik týyp otyr. Kóshi-qon ortalyǵy Aqtóbe qalasy, Sáńkibaı batyr dańǵyly, 249 mekenjaıynda ornalasqan. Mekeme 13 jumys ornymen jabdyqtalǵan.
«Ortalyqtyń basty mindeti - kóshi qon salasyndaǵy qyzmetterdi alýdy barynsha jeńildetý. Buryn mıgranttarǵa eńbek etý ruqsat qujattaryn berý men ony uzartýǵa 3-5 kúndeı ýaqyt ketetin edi, endi bul protsess kóshi-qon ortalyǵy arqyly 2 saǵat ishinde júzege asyrylýda. Taǵy bir tıimdiligin atap óter bolsaq, buryn atalmysh qyzmet túrin alý úshin eńbek mıgranttary medıtsınalyq tekserýden, daktıloskopııadan ótý, saqtandyrý polısterin rásimdeý men jeke sáıkestendirý nómirlerin alý úshin ártúli mekemelerge júginetin. Qazir bul qyzmetterdi bir ǵana kóshi-qon ortalyǵynan alýǵa jaǵdaı jasalǵan» delingen habarlamada.
Jalpy Aqtóbe oblysynda aǵymdaǵy jyldyń 9 aıynda jergilikti atqarýshy organdar 4 510 627 memlekettik qyzmet kórsetken. Onyń ishinde 82% elektrondy túrde kórsetilgen. Osylaısha, Elbasymyzdyń memlekettik qyzmetterdi 2019 jylǵa deıin 80% elektrondyq formatqa kóshirý boıynsha tapsyrmasy Aqtóbe oblysynda oryndaldy.
Memlekettik qyzmetterdi elektrondy túrde kórsetý turmystyq sybaılas jemqorlyqty joıýǵa múmkindik beredi.
