Aqtóbede kóshedegi oryndyqtardy montaj kóbigimen bekitken merdiger jumysy áshkere boldy

AQTÓBE. KAZINFORM — Aqtóbe qalasy Astana aýdany ákimdigi oryndyqty qaıta bekitýdi tapsyrdy.

Aqtóbe qalasy Altyn orda shaǵyn aýdany Oraz Táteuly kóshesindegi oryndyqtar bıyl jańardy. Jańartý jumystary kezinde tireýi mármár tastan jasalǵan aǵash oryndyqtardyń jerge montaj kóbigimen bekitilgeni anyqtaldy. 

— Astana aýdany ákimdigi abattandyrý jumysy aıasynda 133 oryndyq pen 133 qoqys jáshigin, ıaǵnı barlyǵy 266 dana qala jıhazyn satyp aldy. «Orda snabservıs» JShS merdiger mekemesi ótken aptada ornatý jumystaryn bastady. Oryndyqtar qala ishindegi alańdar men skverlerge, sonyń ishinde Altyn Orda shaǵyn aýdanyna da ornatyldy. Ornatý jumystary aıaqtalǵannan keıin Astana aýdany ákimdiginiń ókilderi komıssııalyq tekseris júrgizdi. Onyń nátıjesinde merdigerge barlyq oryndyqty metall bekitkishtermen qosymsha nyǵaıtyp, bekitý jóninde tapsyrma berildi, — dep habarlady Astana aýdanynyń ákimdigi.

Eske salsaq, Aqtóbede bıyl aýla aýmaǵyn jóndeýge 1 mlrd teńge jumsalady. Al fontandardy kútip ustaý men qyzmet kórsetýge 130 mln teńgeden astam qarjy qarastyryldy.