Aqtóbede kóshe qańǵybastaryn jappaı rentgenge túsirip jatyr
AQTÓBE. QazAqparat - Aqtóbede baspanasyz qańǵyp júrgen adamdardyń bári búgin rentgenge tústi. Qurt aýrýynyń aldyn alý sharasy kezinde jergilikti polıtsııa qyzmeti men qańǵybastardyń ortalyǵy, medıtsınalyq mekeme birge jumys istedi, dep habarlaıdy QazAqparat tilshisi.
Aqtóbe qalasynda júrgen kóshe kezbeleri búgin arnaıy ortalyqqa jınaldy. Baspanasyz, kóshede túnep, tamaǵyn daladan taýyp júrgen adamdardyń barlyǵy rentgenge túsirildi.
«Baspanasyz qalǵan adamdarǵa arnalǵan ortalyq pen Aqtóbe oblystyq týberkýlezge qarsy kúres dıspanseri, «Senim trek» qoǵamdyq birlestigi, jergilikti polıtsııa qyzmeti men qylmystyq atqarý júıesiniń oblystyq departamenti birlese jumys istedi. Týberkýlezben aýyratyn adamdardy anyqtap, olardy emdeýge jiberý kózdeldi. Mobıldi kólik jiberilip, dalada júrgenderdiń bári baspanasyz qalǵan adamdarǵa arnalǵan ortalyqqa jetkizildi. Psıhologtar jumysqa kirisip, krımınalıster DNK analızin alyp, ІІD bazasyna saqtaýǵa qujat jınady. Kezdesý kezinde dalada júrgen adamdardyń ortalyqqa qonystana alatyny túsindirildi. Olar tegin tamaqtanady, kıim-keshek beriledi», - dedi Janat Moldaǵalıev.
Aıta keteıik, sońǵy jyldary ortalyqta otbasylyq janjaldan soń baspanasyz qalǵan adamdar da ákelinip jatyr. Qazir munda bes eresek, eki bala bar. Tańerteńnen beri barlyǵy 72 adam rentgenge tústi. Qalada barlyǵy 200-ge jýyq qańǵybas bar.
