Aqtóbede kóshi-qon zańnamasyn buzǵan Aýǵanstan azamattary ustaldy
AQTÓBE. KAZINFORM – Aqtóbede Kóshi-qon zańnamasyn buzǵan Aýǵanstan azamattary ustaldy. Olardyń kóbi Astanadaǵy joǵary oqý ornynyń stýdentteri.
Aqtóbede patrýldik polıtsııa qyzmetkerleri men Ulttyq qaýipsizdik komıtetiniń Shekara qyzmeti «Quqyqtyq tártip» jedel profılaktıkalyq is-sharasyn ótkizip jatyr. Polıtsııa men shekarashylar Samara-Shymkent tasjolynyń Qarabutaq aýyly mańynda úsh avtokólikti toqtatty. Qujattardy tekserý kezinde Aýǵanstan azamattarynyń Kóshi-qon zańnamasyn buzǵany anyqtaldy.
- 15 sheteldiktiń jeteýinde vıza merzimi ótip ketken. Al beseýinde tólqujattary bolmady. Mán-jaıdy anyqtaý úshin olar oblystyq PD-niń Kóshi-qon qyzmeti basqarmasyna jetkizildi. 11 sheteldiktiń elordadaǵy joǵarǵy oqý ornynyń stýdenti ekeni anyqtaldy. Qalǵandary jumys vızasymen kelgen. Qazirgi kezde Astanadaǵy oqý ornynyń ókilin Aqtóbege shaqyryp otyrmyz. Olar kelgenshe sheteldikter polıtsııa bóliminde bolady, - dedi Aqtóbe oblystyq PD baspasóz qyzmetiniń jetekshisi Erbolat Sarqulov.
Aıta keteıik, keshe Aqtóbede iri jol apaty bolyp, bir otbasynyń 5 adamy kóz jumdy. Olardyń úsheýi — bala.
