Aqtóbede Kórisý kúni 100 áje men 100 kelin kerýen qurdy
AQTÓBE. KAZINFORM – Qaladaǵy «Geolog» mádenıet úıi 100 áje men 100 kelin kerýenin uıymdastyryp, Kórisý kúnin atap ótti.

Aqtóbe qalasy Eset batyr turǵyn alabynda búgin ene men kelin kerýeni ótti. Oǵan kımeshek kıgen ájeler men oramal tartqan kelinder qatysty.

- Byltyr kımeshek kıgen 100 áje kerýeni ótti. Bıyl 100 enege 100 kelin qosyldy. Keler jyly taǵy 100 nemere ertip, kerýenge shyǵady dep josparlap otyrmyz. Naýryznama tujyrymdamasynyń birinshi kúni, ıaǵnı, Kórisý kúni osylaısha qaıta jańǵyryp jatyr. «Geolog» mádenıet úıiniń «Sholpy» klýby uıymdastyrǵan shara halyqtyq sıpat alyp keledi. Ulttyq kıimdi bir kún emes, kúndelikti jumysqa kıip júrýge bolady. Ájelerimizdiń arasynda 90 jastan asqandary men 65 jastaǵy qarııalar bar. Al kelinderdiń arasynda jasy da, bosaǵany 10 jyl buryn attaǵany da bar,- dedi «Dástúrge jol» analar keńesiniń múshesi Bıbigúl Ábdishúkirqyzy.

Qolyna qyran qordyrǵan batyrlar men tazy ertken er azamattar da kerýende boldy. Bul sharaǵa mádenıet úıi eki apta buryn daıyndalǵan.
- Aqtóbe qalasy Almaty aýdany Eset batyr turǵyn alabynda mektep, balabaqsha, túrli mekemeler bar. Olardyń bárine eki apta buryn habar berip, kerýenge atsalysýdy suradyq. Sonymen birge «Geolog» mádenıet úıiniń ájeler ansambli qosyldy. 100 áje men 100 kelin kerýeni júrip ótken soń turǵyndar kontsert tamashalady. Aýyldyń ádemi kórinisi osy,- dedi «Geolog» mádenıet úıiniń dırektory Arman Jıenalıev.

Aqtóbelik ólketanýshy Bekarystan Myrzabaev bul kúnniń tanymdyq róli basym bolý kerek dep sanaıdy.

- Qazir tanymymyzdy keńeıtý kerek dep aıtamyz. 10 kún boıy toılaı bermeı, astronomııalyq negizi bar ekenin de aıtý kerek. Omar Haıam jyldyń uzaqtyǵyn 264 kún 5 saǵat 17 mınýt 46 sekýnd dep bilgileıdi. Ál-Bırýnımen ekeýi osyndaı naqty dáldikpen eseptegen. Aqpan 28 kúnnen aıaqtalady, tórt jylda bir ret Kibise jyly keledi. Bir kún qaıdan paıda boldy? Ol bir jylda jınalǵan 5 saǵat 17 mınýt 46 sekýndtan paıda boldy. Tórt jylda 21 saǵat 12 mınýt bolady. Bul 24 saǵatqa jetpedi. Jınalyp-jınalyp, 13 kún aıyrmashylyq shyqty. 14-nen bastap Naýryz keldi dep kórisetin sebebimiz sol. Kórisý kún men tún teńelgen kezde bolý kerek dep esepteımin. Meniń estigenim boıynsha er adammen er adam, áıelmen áıel qushaqtasyp kórisedi. Al er men áıel qol alysyp kórisedi. Tek Naýryzda, Amal kúninde emes, kópten kórispegender solaı kórisedi. Osyndaı dástúrimizdi jańǵyrtqan durys dep oılaımyn. Kórisken, bir-birin aralaǵyn durys. Aqtóbeniń Baıǵanın, Oıyl, Temir, Qobda aýdandarynda saqtalǵan,- dedi ólketanýshy.

Búgin Aqtóbeniń barlyq aýdan, aýylynda Kórisý kúni ótip jatyr. Al keshke «Kóktem basy – Kórisý kúni» atty mádenı-kópshilik sharasy ótedi.
Aıta keteıik, Mańǵystaýdaǵy Otpan taýda «Birlik oty» jaǵyldy.