Aqtóbede qorshaǵan ortaǵa zııany joq ekopaket óndiriledi
AQTÓBE. QazAqparat - Aqtóbedegi polıetılen dorba shyǵaratyn kásiporyn ekologııalyq taza ónim daıyndaýǵa kóshti. Jyldap jatsa da shirimeı, qorshaǵan ortaǵa zııan ákeletin polıetılendi almastyratyn ónim el naryǵyna shyǵarylady, dep habarlaıdy QazAqparat 24.kz silteme jasap.
Kásipker jańa jelini iske qosý úshin «Óndiris» baǵdarlamasy arqyly jeńildetilgen nesıe alǵan. Jańa tsehtaǵy zamanaýı jeli jylyna 1200 tonna ekopaket daıyndap shyǵarady. Bul ónimniń burynǵydan aıyrmashylyǵy nede? Birinshiden, qorshaǵan orta men adam densaýlyǵyna zııany az. Ekinshiden, qoqysqa tastalǵan paket 1 jyldyń ishinde joıylyp, topyraqqa aralasyp ketedi. Bul qaldyqsyz óndiris. Shıkizatty shet memleketterden alyp otyr.
«Tsehta biz polıvet, polıteron paketterin shyǵaramyz. Qyzyl, kók paketter shyǵarylady. Medplenka, mýsor, fasovka, bárin jasaımyz. Biz shyǵarǵan paketterdiń qorshaǵan ortaǵa zııany joq» deıdi tseh mehanıgi Naýryzbek Abdolkákimov.
Kásiporyn qaladaǵy ındýstrıaldy aımaqta ornalasqan. Bul jerden 1 gektar jer alyp, úlken óndiristik nysan saldy. Kásipker buǵan deıin ǵımaratty jalǵa alyp, biraz qıyndyq kórgenin aıtady. Qazir jeńildetilgen nesıege qol jetkizip, kásibin keńeıtken jaıy bar.
Tek ekopaketterdi satý ońaı bolmaı tur. Paket quramyndaǵy erigish untaq qospany qymbatqa satyp alatyndyqtan, ónimniń baǵasy 6-7 paıyz joǵary.
«Ony arzandatý úshin biz qazir japonııalyq fırmamen sheshimge keleıin dep jatyrmyz. Sol qospany ózimiz osy jaqta shyǵaramyz. Ony ary qaraı satamyz. Sol kezde baǵasynyń kádimgi, kúndelikti qoldanystaǵy paketten aıyrmashylyǵy bolmaıdy»,-deıdi kásiporyn basshysy Baýyrjan Júsipov.
Jańa ónimge Qostanaı, Oral men Astanadan suranys túse bastady. Ekopakettiń baǵasyna qaramaı tapsyrys beretinderdiń kóbi - qorshaǵan ortanyń ahýalyna alańdaıtyndar. Aqtóbeniń ózinde eki iri sýpermarket jelisi ekologııalyq taza paketterdi qoldana bastady.
