Aqtóbede korporatıv keshinen keıin tóbeles shyǵaryp, polıtsııaǵa baǵynbaǵandar jazalandy

AQTÓBE. QazAqparat - Jańajyldyq korporatıvtik keshten keıingi tóbeleske qatysýshylar jaýapkershilikke tartyldy, dep habarlaıdy QazAqparat polıtsııaǵa silteme jasap.

Meıramhananyń syrtqy baqylaý kameralarynan tóbelestiń bastalǵany jazylǵan vıdeo tárkilendi.

Polıtsııa qyzmetkerleri «Ulytaý» meıramhanasynyń janynan tóbeleske qatysqan 9 adamdy anyqtady, onyń arasynda áıelder de bar.

Oqıǵaǵa qatysýshylardyń ekeýine QR ÁQBtK 667-babymen, tórteýine 434-babymen hattama toltyryldy.

Polıtsııa qyzmetkerleriniń ar-namysy men qadir-qasıetine nuqsan keltiretin jalǵan málimetti telefonǵa túsirip, taratqan áıel men taksı júrgizýshisine qatysty QR ÁQBtK 73-3-babymen hattama jasaldy.

Barlyq materıaldar zańdy sheshim qabyldaý úshin Aqtóbe qalasynyń ákimshilik sotyna joldandy.

Eske sala keteıik, munyń aldynda Aqtóbe qalasyndaǵy «Ulytaý» meıramhanasynda polıtsııa qyzmetkerleri tóbeleske qatysýshylardy «uryp-soqqany» týraly aqparat taraǵan bolatyn.

Jarııalanymǵa baılanysty janjalǵa qatysýshylardy ustaǵan polıtseılerdiń beınejetonynan alynǵan jazbalar taldanǵan.

31 jeltoqsan saǵat 01:35-te jedel basqarý ortalyǵynyń 102 telefonyna Aqtóbe qalasy Bógenbaı kóshesi 17 mekenjaıynda ornalasqan «Ulytaý» meıramhanasynyń janynda tóbeles bolyp jatqany týraly habar tústi. Atalǵan mekenjaıǵa dereý polıtsııanyń keshendi kúshteriniń jasaǵy jiberilgen.

Іshimdik iship, mas bolǵandar polıtsııa qyzmetkerleriniń eskertýin elemeı, tóbelesti jalǵastyrady.

Sondaı-aq, vıdeojarııalanymdaǵy «jigit» pen «qyz» polıtsııa kelgenge deıin, qaqtyǵysqan adamdar arasyndaǵy tóbeles kezinde soqqy alǵany belgili boldy.

Janjal shyǵarǵandar ustaý kezinde qarsylyq kórsetip, barlyǵy polıtsııa bólimine jetkizildi.

Meıramhanada da polıtseılerdiń qol kóterý faktileri bolǵan joq.