Aqtóbede koronavırýstan kóz jumǵan er adam 4 kún úıinde emdelgen
AQTÓBE. QazAqparat – Aqtóbede 65 jastaǵy er adam koronavırýs ınfektsııasynan kóz jumdy. Dárigerler jaǵdaıy nashar bolǵanda kómekke júgingenin aıtty, dep habarlaıdy QazAqparat tilshisi.
«Sońǵy kezderi koronavırýs ınfektsııasyn juqtyrǵandardyń kóbi jaǵdaıy nasharlaǵanda ǵana dáriger kómegine júginip, em alyp jatyr. Qazir oblysta 16 adam jansaqtaý bóliminde jatyr, onyń altaýy jasandy tynys alý apparatynda qosylǵan. Bir naýqas kóz jumdy. 65 jastaǵy er adam maýsym aıynyń alǵashqy kúnderi aýyryp, tórt kún boıy úıinde em aldy. Dene qyzýy kóterilip, tynys alýy qıyndaǵan kezde ǵana jedel járdem shaqyrdy. Birden jansaqtaý bólimine jatty. Jaǵdaıy kúrt nasharlap, kóz jumdy», - dedi oblystyq densaýlyq saqtaý basqarmasynyń basshysy Áset Qalıev.
Aqtóbe oblysynda epıdemıologııalyq jaǵdaı turaqty. Oblysta 685 naýqasta vırýs anyqtalsa, onyń 147-i sımptomsyz. Naýqastardyń 392-i emdelgen. Aýyrǵan adamdardyń 54-i bala. Balalardyń 50-i em qabyldap, úıine shyqty.
