Aqtóbede koronavırýspen kúresip júrgen medıtsına qyzmetkerleri marapattaldy
AQTÓBE. QazAqparat – Aqtóbede medıtsına qyzmetkerlerine memlekettik nagradalar berildi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbede M.Ospanov atyndaǵy BQMÝ kafedra meńgerýshisi Meırambek Qurmanǵazınge «Parasat» ordeni tabys etildi. Aqtóbe medıtsına ortalyǵynyń medıtsınalyq dırektory Ardaq Esenjolova, №3 qalalyq emhananyń bas dárigeri Jánibek Narmuhamedov «Qurmet» ordenin ıelendi.
Taǵy tórt dáriger «Eren eńbegi úshin» medalin aldy. Olardyń qatarynda Shalqar, Qarǵaly aýdandyq aýrýhanalarynyń, qalalyq emhanalardyń dárigerleri bar.
Shara barysynda «Shapaǵat» medali, «Densaýlyq saqtaý isine qosqan úlesi úshin» tósbelgisi tabys etildi.
«Búginde elimiz ózge memleketter sekildi koronavırýs indetiniń pandemııasyna qarsy kúresip jatyr. Bul - óte aýqymdy, aýyr ári qıyn jumys. Memleket qazirgi tańda dertke shaldyqqandar sanyn barynsha azaıtýdyń, naýqastardy qajet dárilermen jáne emdeý quraldarymen qamtamasyz etýdiń barlyq sharalaryn qabyldaýda. Osy aýrýmen kúreste dárigerler men medbıkelerge úlken júk túsip otyr. Kún saıyn sizder sheksiz batyldyqty, erjúrektilik pen adamdarǵa degen qamqorlyqty kórsetip júrsizder»,- dedi oblys ákimi Ońdasyn Orazalın.
