Aqtóbede koronavırýs juqtyrǵan sábıdiń ata-anasynan indet anyqtalmady
AQTÓBE. QazAqparat - Aqtóbe qalasynda 1 jasar náreste vırýsty kimnen juqtyrǵany anyqtalýda. Sebebi ata-anasynan indet tabylmaǵan, dep habarlaıdy QazAqparat tilshisi.
Aqtóbe oblystyq Densaýlyq saqtaý basqarmasynyń basshysy Áset Qalıev «Aqtóbe» jergilikti telearnasynda óńirdegi epıdemıologııalyq ahýal týraly aıtyp berdi. Búginge deıin aımaqta barlyǵy 176 adam adam indetke shaldyqsa, onyń 13-i bala.
«1 jastaǵy bala ınfektsııalyq aýrýhanaǵa jatqyzyldy. Ata-anasy, ájesimen birge turady. Olar vırýs juqtyrǵan adamdarmen qarym-qatynasta bolmaǵan. Epıdemıologııalyq zertteý júrip jatyr. Ata-anasy vırýstyq ınfektsııa bar zatty úıge ákelgen bolýy múmkin. Naqty kimnen juqtyrǵany belgisiz. Aldaǵy ýaqytta naqtylanady», - dedi Áset Qalıev.
Aıta keteıik, oblys boıynsha 21 myńnan astam adam vırýsqa qarsy tekserýden ótti. Birneshe laboratorııada táýligine 1200 analız alynyp, zertteledi.
«Jeke klınıkada taǵy bir laboratorııa iske qosylsa, kúnine 1700 analız alyp, tekseremiz. Ekspress-testiń 7200 danasy taǵy ákelindi. Olar jergilikti bıýdjet esebinen alyndy. 12 mamyrdan bastap vırýsqa qarsy kúres jumystaryna jumyldyrylǵan qyzmetkerler tekseriledi. Oblys boıynsha barlyǵy 1825 medıtsına qyzmetkeri eńbek etip júr. Eshqaısysy indetke shaldyqqan joq», - dedi Á.Qalıev.
Eske salaıyq, 11 mamyr saǵat 17.40-taǵy málimet boıynsha, elimizde vırýsty juqtyrǵan taǵy 22 adam tirkeldi. Onyń ishinde Aqtóbe oblysynda indet 1 jasar náresteden anyqtaldy. 9 mamyr kúni onyń qyzýy kóterilip, ishi ótken. Al 10 mamyr kúni jedel járdem shaqyrylyp, odan analız alynǵan. Laboratorııalyq zertteýden soń balanyń vırýs juqtyrǵany belgili boldy. Sábı ınfektsııalyq aýrýhanaǵa jatqyzyldy. Jaǵdaıy qanaǵattanarlyq. O blystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti balamen j aqyn qarym-qatynasta bolǵan adamdar anyqtalyp, oqshaýlandyrylǵanyn málim etken edi.
