Aqtóbede koronavırýs juqtyrǵan oqýshy aýrýhanada jatyr
AQTÓBE. QazAqparat – Aqtóbede 9-synyp oqýshysy ınfektsııalyq aýrýhanada em alyp jatyr, dep habarlaıdy QazAqparat tilshisi.
Ótken táýlikte Aqtóbede 13 adamnan koronavırýs ınfektsııasy anyqtaldy. Aqtóbe qalasy men Alǵa, Muǵaljar, Hromtaý, Temir aýdandarynyń turǵyndary derttiń sımptomdy túrine shaldyqqan. Aýrýshańdyqtyń ósý deńgeıi 0,3% quraıdy.
«Ótken táýlikte Muǵaljar aýdandyq aýrýhanasyndaǵy hırýrgııa bóliminde medbıkeden koronavırýs ınfektsııasy anyqtaldy. Ol dárigerler baqylaýyna alyndy», - dedi Aqtóbe oblystyq sanıtarııalyq-epıdemıologııalyq baqylaý departamenti basshynyń orynbasary Muhtar Serbaev.
Qazirgi kezde oblys boıynsha barlyǵy 752 adam úı karantıninde jatyr. Sońǵy kezde óńirde ósim baıqalady.
«Qazirgi kezde ınfetsııalyq aýrýhanalarda 89 naýqas bar. Onyń 10-y jansaqtaý bóliminde jatyr. Koronavırýs ınfektsııasyn juqtyrǵandardyń arasynda balalar da bar. Qazir 18 bala úı karantıninde jatyr. Bir oqýshy ınfektsııalyq aýrýhanada. 9-synyp oqýshysynyń jaǵdaıy jaqsy. Ol bir aptadan soń úıine shyǵarylady», - dedi oblystyq densaýlyq saqtaý basqarmasynyń basshysy Rústem Isaev.
Búginge deıin oblysta 4098 jaǵdaı tirkeldi. Onyń 95 paıyzdan astamy jazyldy.
