Aqtóbede koronavırýs juqtyrǵan balalar men júkti kelinshekterdi dárigerler baqylaıdy
AQTÓBE. QazAqparat – Aqtóbedegi ınfektsııalyq statsıonarlarda 197 adam em alyp jatyr. Onyń 18-i jansaqtaý bóliminde, dep habarlaıdy QazAqparat tilshisi.
Aqtóbe oblysy koronavırýs matrıtsasy boıynsha «sary» aımaqqa ótti . Bir táýlikte óńirde 35 adamnan koronavırýs ınfektsııasy anyqtalǵan. Qazir óńir boıynsha 200-ge jýyq adam aýrýhanada jatyr.
«Qazir oblysta ınfektsııa juqtyrǵan 17 bala baqylaýǵa alynǵan. Onyń bireýi aýrýhanada. Sonymen birge on júkti kelinshektiń úsheýi emdelip jatyr. Dárigerler baqylaýyna alǵan. Karantın statsıonarlarynda 17 adam bar. Bári aýdandarda ornalasqan. Infektsııalyq kereýet júktemesi 45 paıyzdan assa, jansaqtaý bólimindegi tósek-oryn júktemesi 24,6 paıyz», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov. Dárigerler tumaý belgisi paıda bolǵanda birden dáriger kómegine júginý qajet ekenin eske salady.
«Monıtorıng toptardan jáne jergilikti polıtsııa qyzmetinen túsken materıaldarǵa sáıkes 443 aıyppul salyndy. Aıyppul kólemi 54 mln teńgeden asady. Úılestirý ortalyqtarynan túsken shuǵyl habarlama negizinde jospardan tys 48 tekserý júrgizildi. Tekserý qorytyndysy boıynsha 48 obektige 7 mln teńgeden astam aıyppul salyndy. Qaýip seıilgen joq. Sondyqtan barshańyzdy betperde taǵýǵa, qoldy jıi jýyp, antıseptıkterdi paıdalanýǵa, áleýmettik qashyqty saqtaýǵa shaqyramyn», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.
