Aqtóbede koronavırýs juqtyrǵan adamnyń Máskeýden kelgeni anyqtaldy
AQTÓBE. QazAqparat – Aqtóbede tórtinshi adam koronavırýs ınfektsııasyn juqtyrdy. Ol Máskeýden kelip, úıdegi karantınde bolǵan, dep habarlaıdy QazAqparat tilshisi.
«Koronavırýs ınfektsııasyn juqtyrǵan adam 13-22 naýryz aralyǵynda Reseıdiń Máskeý qalasynda issaparda bolǵan. Ol Máskeýden 22 naýryz kúni shyǵyp, poıyzben Orynbor qalasyna keldi. Al 25 naýryz kúni taksımen Aqtóbege jetti. Kelgen kezde turǵylyqty mekenjaıy boıynsha emhanaǵa tirkeýge alyndy. Dárigerler oǵan telefon shalyp, densaýlyǵy týraly aqparat alyp otyrdy. Al 27 naýryz kúni naýqas ózin jaısyz sezinip, provızorlyq gospıtalge jatqyzyldy. Alǵashqy analızi 28 naýryz kúni alynyp, teris boldy. Úsh kún ótkende qaıta alynyp, rastaldy. Qazir emdeý sharasy júrip jatyr. Naýqaspen baılanysty bolǵan adamdar naqtylandy, statsıonarǵa jatqyzyldy», - dedi oblystyq densaýlyq saqtaý basqarmasynyń basshysy Áset Qalıev.
Oblystyq taýarlar men kóretiletin qyzmetter sapasy men qaýipsizdigin baqylaý departamentiniń basshysy Nursulý Berkimbaevanyń aıtýynsha, tórtinshi naýqastyń saraptamasy búgin saǵat 14:29-da habarlandy. Ol provızorlyq gospıtalde jatqan kezde bir palatada ishinde ózge de adamdar boldy. Karantındegi adam da qazir ınfektsııalyq aýrýhanaǵa jetkizildi. Sonymen birge ata-anasy da emdeý mekemesinde.
