Aqtóbede koronavırýs ınfektsııasynyń 15 oshaǵy bar
AQTÓBE. QazAqparat – Aqtóbede balabaqshaǵa baratyn bala men mektep oqýshysynan koronavırýs ınfektsııasy anyqtalyp, bilim oshaqtarynyń bir bóligi karantınge jabyldy, dep habarlaıdy QazAqparat tilshisi.
3 jeltoqsannan kúni búginge deıin koronavırýs ınfektsııasynyń 15 oshaǵy tirkeldi. Onyń 9-y - turǵyn úı bolsa, ózgesi - ujymdyq mekeme.
«Alǵa aýdanyndaǵy balabaqsha tárbıelenýshisinen vırýs anyqtalyp, top karantınge jabyldy. Sonymen birge Aqtóbe qalasyndaǵy №3 mektep-lıtseıiniń 3 synyp oqýshysy indetke shaldyqty. Synyp karantınge jabylyp, naýqaspen baılanysta bolǵandardyń barlyǵy úı karantıninde jatyr. Sonymen birge 4 sharýashylyq sýbektisi de karantınde», - dep habarlady oblystyq sanıtarlyq-epıdemıologııalyq baqylaý basqarmasynyń baspasóz qyzmeti.
Bas sanıtar dárigerdiń qaýlysymen synyp pen top ishi dezınfektsııalanyp, 14 kúnge jabyldy. Qazir 86 adam dárigerlar baqylaýyna alynǵan. Al naýqastardyń jaǵdaıy turaqty.
Eske salsaq, Aqtóbe oblysynda 80-nen astam adam koronavırýs ınfektsııasynan em qabyldap jatyr. Onyń 11-i jansaqtaý bóliminde.
