Aqtóbede koronavırýs ınfektsııasyn juqtyrǵandar sany eki ese artty
Aqtóbe oblysy boıynsha 1-7 shildede - 417, al 8-15 shilde kúnderi aralyǵynda 930 adamnan koronavırýs ınfektsııasy anyqtaldy. Ósim 2,2 esege jetken.
«Bir táýlikte 215 adamnan koronavırýs ınfektsııasy anyqtaldy. Onyń 137-si derttiń sımptomdy túrine shaldyqqan. Aqtóbe oblysy 9 shildeden bastap «qyzyl« aımaqta. Sondyqtan saqtyq sharasyn únemi jadymyzda ustap, basy artyq kópshilik jınalatyn jerge barmaýymyz kerek. Qurban aıt ta onlaın uıymdastyrylady. Biz ǵana emes, kórshiles oblystyń bári «qyzyl» aımaqta. Bul jaǵdaıdyń qanshalyqty qıyn ekenin kórsetedi»,- dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
Qazirgi kezde oblys boıynsha 309 adam aýrýhanada em qabyldap jatyr. Onyń 217-i Aqtóbe qalasynda.
«Aqtóbe qalasynda 31 adam jansaqtaý bóliminde jatyr. Onyń beseýi ókpeni jasandy jeldetý apparatyna qosylǵan. Infektsııalyq statsıonar júktemesi 55%, al jansaqtaý bólimindegi kereýet júktemesi 38% jýyqtady»,- dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Óńirge 400 myńǵa jýyq vaktsına jetkizildi. Turǵyndardyń 191 myńnan astamy birinshi, al 102 myńnan astamy eki komponentti de saldyrdy.
«Qazir qalada tórt jyljymaly vaktsınatsııa pýnkti jumys istep tur. Hayat-Vax vaktsınasy túgesilip, tek Spýtnık V vaktsınasyn saldyryp jatyrmyz»,- dedi Bekbolat Іzbasarov.
