Aqtóbede koronavırýs ınfektsııasyn juqtyrǵan úsh júkti kelinshektiń jaǵdaıy aýyr

AQTÓBE. QazAqparat – Aqtóbe bir táýlikten soń «jasyldan» qaıta «sary» aımaqqa ótti. Qazir 300-den astam adam ınfektsııalyq statsıonarlarda em qabyldap jatyr, dep habarlaıdy QazAqparat tilshisi.

Aqtóbe oblysy boıynsha bir táýlikte taǵy 99 adamnan koronavırýs ınfektsııasy anyqtaldy. Beısenbi kúni «jasyl» aımaqqa ótkenimen, búgin qaıta «saryǵa» aýysty. Qazirgi kezde 300-den astam adam aýrýhanada em qabyldap jatyr. Onyń 30-y jansaqtaý bóliminde.

Oblystyq densaýlyq saqtaý basqarmasynyń habarlaýynsha, 6 adam jasandy tynys alý, 20 naýqas ınvazıvti emes tynys alý qurylǵysyna qosylǵan.

«Oblysta 107 baladan koronavırýs ınfektsııasy anyqtalsa, onyń úsheýi aýrýhanada jatyr. Olardyń jaǵdaıy ortasha aýyr. Sonymen birge 28 júkti áıelden KVI anyqtalyp, 15-i ınfektsııalyq statsıonarǵa jatqyzylǵan. Qazirgi kezde úsh júkti kelinshektiń jaǵdaıy aýyr», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.

Óńirde Temirjol aýrýhanasy men «Shaǵala» emdeý ornyndaǵy ınfektsııalyq statsıonarlar jabyldy. Qazir Aqtóbe qalasy boıynsha oblystyq ftızıopýlmonologııalyq ortalyq, ınfektsııalyq aýrýhana men Aqtóbe medıtsına ortalyǵy ǵana COVID-19 juqtyrǵan naýqastardy qabyldap jatyr. Infektsııalyq kereýetter júktemesi 45,4%, al jansaqtaý bóliminde 37,7% qurap otyr.

«Aqtóbe oblysy boıynsha oqý jyly bastalǵaly 700-den astam oqýshydan koronavırýs ınfektsııasy anyqtaldy. Al qazir 100-den astam bala baqylaýda. Barlyǵy 112 synyptyń oqýshysy karantınge jiberilip, olar qashyqtan bilim alyp júr», - dedi oblystyq sanıtarııalyq-epıdemıologııalyq baqylaý departamenti basshysynyń mindetin atqarýshy Gúlbaný Dáýletova.

Aıta keteıik, oblys boıynsha 1200-den astam adam statsıonarlyq em qabyldap júr. Olar vırýsty jeńil túrde ótkerip jatyr. Arasynda keri áserin sezbese de PTR synamasy oń mán kórsetken adamdar bar.