Aqtóbede koronavırýs ınfektsııasyn juqtyrǵan úsh bala jansaqtaý bóliminde jatyr
Aqtóbe oblysy boıynsha bir táýlikte 452 adamnan koronavırýs ınfektsııasy anyqtaldy. Kóbi derttiń sımptomdy túrine shaldyqqan. Oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaevtyń aıtýynsha, onyń 37-i 14 jasqa tolmaǵan bala.
«Balalardy emdeý úshin statsıonardan 50 kereýettik oryn daıyndaldy. Qazirgi kezde 26 bala em qabyldap jatyr. Onyń úsheýi jansaqtaý bóliminde. Olarǵa qajetti em-dom jasalyp jatyr. Qýanyshqa oraı, vırýs juqtyrǵan balalar arasynda qaıǵyly jaǵdaı tirkelmedi. Degenmen buryn biz «kóbine eresek adamdar juqtyryp, aýyrady» dep aıtsaq, qazir jastar men balalar arasynda da ósim bar», - dedi oblystyq densaýlyq saqtaý basqarmasynyń basshysy Rústem Isaev.
Óńirlik kommýnıkatsııalar qyzmetinde ótken baspasóz máslıhatynda balalarǵa arnalǵan vaktsına týraly da aıtyldy.
«Balalarǵa Pfizer vaktsınasyn saldyrý josparda bar. 12-18 jas aralyǵyndaǵy balalar qamtylady. Qazir bul týraly Densaýlyq saqtaý mınıstrligi de aıtyp, aqparat berip otyr. Bir erekshelegi, vaktsınany saqtaýdyń óz ereksheligi bar. Talap boıynsha -80°C saqtalýy tıis. Mundaı saqtaý orny tek qan ortalyǵynda bar. Vaktsına ákelinse, biz arnaıy keste boıynsha tasymaldap, sol nysanda balalardy vaktsınatsııalaýdy josparlap otyrmyz. Bul shamamen qazan aıynda jasalatyn jumys», - dedi Rústem Isaev.