Aqtóbede koronavırýs ınfektsııasyn juqtyrǵan balalar men júkti áıelder aýrýhanada em alyp jatyr
AQTÓBE. QazAqparat – Aqtóbe oblysy boıynsha koronavırýs ınfektsııasyn juqtyrǵan 8 bala men 8 júkti kelinshek dárigerler baqylaýyna alyndy, dep habarlaıdy QazAqparat tilshisi.
Óńirde karantın shekteýi jeńildedi. Endi lagerler men jazǵy mektep esh kedergisiz jumys isteı alady. Sonymen birge bazar, saýda úıleri de jumysyn ishki tártipke saı júrgizedi. Oıyn-saýyq ortalyqtaryndaǵy balalar alańy da ashyldy. Degenmen epıdemıologtar «jasyl» aımaqtamyz dep saqtyq sharasyn esten shyǵarmaýǵa úndedi.
Bir táýlikte 27 adamnan koronavırý ınfektsııasy anyqtaldy. Onyń 22-i sımptomdy. Aqtóbe qalasymen qatar Yrǵyz, Muǵaljar, Hromtaý aýdandarynyń turǵyndary aýyryp, em izdegen. Jalpy alǵanda búginge deıin 11334 jaǵdaı tirkelse, onyń 94 paıyzǵa jýyǵy jazyldy. Qazir úı karantınindegi adam sany 3 myńǵa jýyqtaıdy.
«Búginde ınfektsııalyq aýrýhanalarda 268 adam em alyp jatyr. Onyń 190-y Aqtóbe qalasynda. Jansaqtaý bóliminde 22 naýqas bar. Densaýlyǵy nasharlaǵan bes naýqas ókpeni jasndy jeldetý apparatyna qosyldy. Áli de 47 bala dárigerler baqylaýynda bolsa, onyń 8-i statsıonarlyq em alyp jatyr. Barlyǵy 34 júkti áıeldiń de 8-i aýrýhanaǵa jatqyzyldy», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Óńirde ınfektsııalyq statsıonarlar júktemisi 19,7, al jansaqtaý bólimindegi kereýet júktemesi 13,7 % quraıdy.
