Aqtóbede koronavırýs ınfektsııasymen aýyrǵan adamdardy ońaltý úshin 34 mln teńge bólindi
Aqtóbe oblysynda epıdemıologııalyq jaǵdaı turaqty. Qazir bir kezderi koronavırýs ınfektsııasyn juqtyryp, jazylǵan adamdardy ońaltý jumysy jolǵa qoıylǵan.
«Árbir emhana ambýlatorlyq kómk kórsetedi. Sonymen birge kúndizgi statsıonar bar. Ońaltý ortalyqtary men shıpajaılarda da em qabyldaýǵa bolady. Oblys boıynsha 40-qa jýyq ambýlatorlyq mekeme bar. Sol emhanalarda tirkelgen adamdar ońaltý emin ala alady. Oǵan emdik dene shynyqtyrý qyzmeti, fızıoterapııa jáne dárilik em kiredi. Eger fızıoterapııa bólimi bolmasa, ózge emdeý mekemesine joldama beredi», - dedi Aqtóbe oblystyq densaýlyq saqtaý basqarmasy basshysynyń orynbasary Bekbolat Іzbasarov.
Ońaltý jumysy ásirese koronavırýs ınfektsııasyn juqtyryp, jansaqtaý bóliminde em qabyldaǵan adamdar úshin mańyzdy. Sonymen birge ókpesiniń teń jartysy zaqymdanǵan, tynys alý joly syr bergen, demigip, entigip qalatyn adamdar da mindetti túrde saýyqtyrý keshenderine barýy tıis.
«Mindetti medıtsınalyq saqtandyrý qorynyń oblystyq fılıalynda ońaltý sharasyna qarjy bólip otyr. Bıyl 33 emdeý mekemesimen kelisim jasaldy. Byltyr barlyq ońaltý jumysyna 2 mıllıard teńgege jýyq qarjy bólinse, onyń 34 mıllıon teńgeden astamy koronavırýs ınfektsııasyna shaldyǵyp, keıin em qabyldaǵan naýqastarǵa jumsaldy. Bıyl barlyǵy 3 mıllıard teńge bólinse, onyń da 34 mıllıon teńgesi kovıdten jazylǵan adamdardy ońaltýǵa bólinedi», - dedi «Áleýmettik medıtsınalyq saqtandyrý qory» KeAQ Aqtóbe oblysy boıynsha fılıalynyń dırektory Altaı Ýrazbaǵambetov.
