Aqtóbede koronavırýs anyqtalǵan úshinshi naýqas Mysyrdan kelgen
AQTÓBE. QazAqparat – Aqtóbede indet juqtyrǵan úshinshi turǵyn anyqtaldy. Ol Almaty arqyly Mysyrdan kelgen, dep habarlaıdy QazAqparat tilshisi.
«Keshe keshkilik úshinshi adamnan koronavırýs ınfektsııasy tirkeldi. Er adam 13-19 naýryz aralyǵynda Mysyrda bolyp, 19 naýryzda Almatyǵa keldi. Almatydan 20 naýryz kúni Aqtóbege ushyp kelip, úı karantıninde boldy. Al 29 naýryz kúni qyzýy kóterilip, tamaǵy aýyryp, jedel járdem shaqyrdy. Odan birden analız alynyp, indet anyqtaldy. Infektsııalyq aýrýhanada arnaıy boksqa jatqyzyldy. Úıindegi anasy da provızorlyq gospıtalge jatqyzyldy, Naýqastyń jaǵdaıy qanaǵattanarlyq, em qabyldap jatyr», - dedi oblystyq taýarlar men qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aıta keteıik, bortta onymen birge 21 adam bolǵan. Onyń bári anyqtaldy, analız alyndy.
«Ushyp kelgen kezde odan analız alyndy. Biraq teris nátıje kórsetti. Arada ýaqyt ótkende vırýs belgisi kórindi», - dedi oblystyq densaýlyq saqtaý basqarmasynyń basshysy Áset Qalıev.
